Аьр кайсы урыслардай болып, согыс спецоперациясы да алдышылыкка йигерли эр йигитлерди салады эм оларды сынайды…
Биз тынышлы яшавда оьмир суьрип турамыз, Украина ман Россия япсарлары араларында болатаган урысларды тек телесюжетлерден, баспа шыгармаларыннан билемиз. Сонда катнасатаган аьскершилер, бу куьнлерде, сол якларда болатаган ислер акында бизге аьскерши корреспондентлер янъы технологиялар аркалы билдиредилер… Аьскершилер, олардынъ юзлери тек билдируьв булаклары болып калмайды, олар –эрликтинъ тири шайытлары, Уллы Россия Элининъ алал увыллары…
Ис борышыма коьре, согыс спецоперациясы басланганнан алып, онлаган аьскершилер, олардынъ йигитликлери, алган савгалары акында язганман. Оьзек те, тыншаюв болжалга келгенде, бир неше СВО катнасувшысы ман йолыгыскан вакытлар да болган. Оларга соравларымызды тувра берип, явап та алганмыз, ама баьриси мен коьрисип, соьйлемеге амал болмайды. Солай болганда, аьскерши акында билдируьвлерди ювыклары, власть органларынынъ ваькиллери мен соьйлесип, аламыз эм, соьйтип те язамыз. Баьтирлердинъ йигитлиги мен халк та таныс болмага керек…
Коьбисинше биз аьскерши мен, макаладынъ болаяк бас келбети мен суьврет аркалы танысамыз. Газета куллыкшысына соны ман бирге аьскерши акында билдируьвлер де келедилер: кайдай аьскер боьликте ислейди, борышларды толтырады, кайсы ерден СВО-га куллык этпеге кеткен эм сондай баскалар. Билдируьвди алганлай ок, биринши болып, биз суьвретке караймыз. Соннан караган аьскерши мен танысамыз. Аьр кайсысы карасында да йигерлик, коьзлерин де аз-маз куьнъиртлик те сезилмей болмайды, тек сонда урыслар аркалы келген сулып эм енъуьвге сеним нуры…
Алдымызда куьн сайын яшав оьмири уьзилмеге болатаган, ама Элдинъ кавыфсызлыгын яклап турган аьдемнинъ суьврети. Сол аьдемлердинъ яшав тарихлери сукландырады: кызыклы эм кавыфлы…
Меним аьскершилерге багысланып язылган макалаларымнынъ келбетлери туьрли, аьр бирисининъ бактысы да баска, олар ортак исти – Россия кавыфсызлыгын саклавда катнасатаган болсалар да, биревси – мобилизация аркалы кеткен, баскасы – аьскершилик ис аьрекетин сайлаган, уьшиншиси – юрек шакырувы ман элди коршалавга атланган… Баьриси де енъуьв келеегине сенедилер.
Согыс, урыс болсын, сонда катнасатаган аьскершилердинъ биреви де, бир заманда да данък уьшин куллык этпеген, бу куьнлерде де сондай, СВО катнасувшылары коьп затлар акында хабарламайдылар, йигитликлерин ясырадылар. Ама биз билемиз, аьр кайсы аьскершидинъ артында да – кыйынлы йоллар эм йыллар, уйкысыз туьнлер, каны ман яны ман явдан босатылган ерлер. Солай ок, олар уьшин уьйлеринде тилек тилеп турган аьели, кардаш-тувганлар…
Ногай районымыздынъ кишкей авылларынынъ бириси Кумлыда тувып-оьскен йигит яс Равиль Асан увылы Бегалиев те 2024-нши йыл, бактысына коьре, СВО еринде аьрекетти баслады.
Равиль Новороссийск каласында контрактка кол баскан. Онынъ аьскерли аьрекети бу куьнлерде Запорожье областинде юреди. Онынъ ис борышы ава-десант аьскер сыраларында барады. Равиль оьзининъ ис борышларын уьйкен яваплылык пан толтырады, йолдаслары арасында сыйы да йогары дережеде.
Аьскершидинъ яслыгы, бала шагы тувган авылы Кумлыда оьткен. Авыл еринде тувып-оьскен балаларга кишкейлей сый-оьрмет, патриотизм сезимлер коьндириледи. Патриотизм – тек тувган элге суьйим тувыл, сол яшаган ердинъ кызыксынувларын, яшав оьмирининъ баасы ман болса да, яклав.
Согыс спецоперациясынынъ алдышылыгында аьскершилерининъ аьр бир абытында патриотизм, олардынъ аьр бириси баскасы уьшин оьз янын бермеге аьзир. Аьлиги заманлардынъ баьтирлери – эртегилер персонажлары тувыл, яны бар аьдемлер, куьн сайын Тувган эли уьшин йигитлик этип юргенлер…
Буьгуьнлерде бизде оьктемсигендей йигилеримиз бар, солардынъ бириси – Равиль Асан увылы Бегалиев. Ондай яслар бизге ярык келеектегиге сенимди тувдырадылар. Олар – Россиядынъ оьктемлиги. Алдышылыкта патриотизм – бос соьзлер тувыл, аьрекет, кан куйылган майданлар, ян тери мен босатылган япсарлар, яс яшав оьмир – баьриси де Аталык уьшин.
Сенемиз енъуьвдинъ келеегине эм Равильдей йигитлер сав-эсен уьйге кайтаягына.
Г.Сагиндикова,
РФ Журналистлер союзынынъ агзасы.
Суьвретте: Аьскерши Р.Бегалиев.
