Янъыларда «Шоьл тавысы» республикалык газетасынынъ бетлеринде халкымыздынъ биринши кеспили академиялы йырлавшысы Коьшманбет Зарманбетовтынъ эстелигине, онынъ тувганлы 70 йыл болувына багыслап ДР эм РФ ат казанган маданият куллыкшысы Нарбике Муталлапова язган макала шыкты. Сол макаладан тура бизге ДР ат казанган окытувшы Кезибан Анваровна Батырова оьз ойы акында язды.
«Шоьл тавысы» газетасында Нарбике Арслановнадынъ белгили ногай йырлавшы, оькинишке эртерек яшавдан кешкен Коьшманбет Зарманбетов акында макаласын окып, оьзимнинъ аданасым Асанбий Анвар увылын тагы да эсиме алдым. Асанбий Коьшманбеттен ясы ман уьйкен эди, ама оларды оьз халкына, ногай йырына суьйими байланыстырган. Бу йырлавшылардынъ несили таза юрекли, шынтылайын оьз халкын суьйген эм йырларды яныннан оьткерип йырлаган. Солардынъ сырасында меним бирге окыган тенъим, ярасык эм куьшли тавыслы йырлавшы Умар Ваисов та (яткан ери еннетли болсын) бар. Бу бир несилдинъ йырлавшылары аьли де халк эсинде коьп яшарлар. Йырлавшылардынъ яс несили олардынъ зейинлигине тийисли баа берерлер, – деп язады Кезибан Анваровна.