Йыл сайын 12-нши июньде элимиз маьнели патшалык байрамы – Россия куьнин белгилейди. Бу куьн биз мынъйыллык тарихли, аьлемет асабалыгы болган, уьйкен ерде коьп туьрли халкларды, маданиятларды бирлестирген элимизди оьрметлеймиз. Элимиздинъ туьрли ерлеринде шаралар озадылар, сонынъ сырасында бизим Ногай районда да. Мунда орталык балалар китапханасынынъ куллыкшылары туьрли яслы катнасувшыларды йыйнаган аьлемет шаралар озгардылар. Балалар китапханасынынъ куллыкшылары саьбийлер уьшин «Меним Тувган ерим – Россия» деп, асфальтта суьврет ясав конкурсын уйгынладылар. Солай ок авыл китапханалар куллыкшылары «Россия терезелери» акциясына косылдылар, олар китапханалардынъ терезелерин патриотлык суьвретлер эм плакатлар ман ярасыкладылар. Сол зат байрам аьлин туьзбеге ярдам этти эм аьдемлердинъ эсин каратты.
Орталык китапханада эм онынъ авыллардагы филиалларында «Меним Россиям» деген билдируьв саьати оьтти. Шарада китапхана куллыкшылары элимиздинъ бай тарихи эм маданияты акында хабарладылар. Онынъ катнасувшылары бек коьп кызыклы билдируьвлер эситтилер.
Н.Кожаева.
Суьвретте: шарадан коьринис.