Оьткен саьли куьн етинши кере шакыртылган ДР Халк Йыйынынынъ 46-ншы сессиясы озгарылды. Онда парламент спикери Заур Аскендеров Халк Йыйынынынъ уьстимиздеги йылдынъ биринши ярымы бойынша эм депутатлар алдында турган борышлар акында доклад пан шыгып соьйледи.
Мировой судьялар эм ДР-нынъ Счетный палатасынынъ аудиторы орынларына депутатлар беркитилди.
Финанс соравлары, айтпага, республикалык бюджетининъ эм 2024-нши йылда ДР-нынъ парызлы медициналык страхованиесининъ Территориальлик фонды бюджетининъ толувы акында законлар проектлери ортага салынып ойласылды. 2025-нши йылга эм 2026-ншы-2027-нши йыллардынъ планланган болжалына, 2025-нши йылга ДР-нынъ патшалык муьлкин приватизациялавдынъ Прогноз планына туьрленислер киритилди. Солай ок ерли самоуправление, коьлик налогы эм сондай баска тармакларда уйгынлав соравларды шешуьв мен байланыслы аьрекет этетаган кайбир законларга туьрленислер киритилген.
Сессияда парламентлер ара биргелес аьрекетлевди оьрлендируьв акында сорав ойласылды, айтпага, ДР Халк Йыйыны эм Беларусь Республика депутатларынынъ Брест область Совети ара, солай ок ДР Халк Йыйыны эм Новгород область Думасы ара биргелес аьрекетлев акында проектлер бойынша келисуьвлер ортага салынып каралды.
Солай ок ДР бойынша Федераллык антимонопольный служба Управлениесининъ аьрекети акында информация тынъланды.