Дагестан Республикасынынъ Оькиметининъ председатели Абдулмуслим Абдулмуслимовтынъ етекшилеви астында республикалык штабынынъ кенъеси озгарылды. Бу йыйында каралган
маьнели соравлардынъ бириси – 2025-2026-ншы йыллардынъ куьзкыс мезгилине ЖКХ объектлерин
аьзирлев. Абдулмуслим Абдулмуслимов йыйылганлардынъ алдына коьплеген борышлар салды. Онынъ
айтувы ман, от ягарлык сезонына аьзирлик коьруьв йорыклары заманы ман толтырылмага керек. Дагестан Республикасында 80 мынъ аьдемди таза сув ман канагатлав ниет пен сув ман аьжетсизлев объектлери курылаятыр. Дагестан яшавшыларды ремонтлав ислери, авариялар ман байланыста ярыкты тымдырув акында заманында билдируьв куллыгы куьшлендирилеек.
Республикада 20 подстанцияларда мощность коьтерилген. 2025-нши йыл Дагестанда угарный газ бан
увланувдынъ саны 20 процентке туьскен. «Чиркей – Махачкала – Каспийск» водовод ислеп баслаяк,
сол зат эки калаларда сув ман байланыслы маьселелерди шешпеге амал береек.
Роспотребнадзор Дагестан Республикасында сув ман аьжетсизлев объектлерде 96 тергевлер юриткен. Кыс шагына карсы йылувлык-сув ман аьжетсизлев объектлерди аьзирлевге Единый оператор 800 миллион маьнет акша шыгарган.
Дагестан Республикасынынъ Оькиметининъ председатели бу тармакта ислейтаган компанияларга ЦУР ман биргелесте исленъиз деп тапшырды. Дагестан Республикасында эки йылдан артык АО
«Сув ман аьжетсизлев тармакта ДР Единый операторы» аьрекетлейди.
Халк авызында айтылганлай, «Язда мыйы кайнаганнынъ, кыста казаны кайнар», сонынъ уьшин
куьз-кыс мезгилине аьлигештен уьйкен яваплылык пан аьзирлик коьруьв керек.
Бизим хабаршы.