«Балады мектебке аьзирле» деп аталып, Савлайроссиялык акция йыл сайын 2014-нши йылдан бери озгарылады эм саьбийлерди суьйинтеди. Акциядынъ бас ниети – коьпбалалы, колайсыз аьеллердинъ саьбийлерине, сакат балаларга, СВО катнасувшыларынынъ аьвлетлерине янъы окув йылы алдында коьмек этуьв, ата-аналарга енъил болсын деп коьтергишлев.

«Шоьл тавысы» республикалык газетасынынъ редакциясында СВО катнасувшысынынъ увылы Нариман авылынынъ А.Асанов атындагы мектебининъ 2-нши классынынъ окувшысы Микаил Ваисовка окувга керек алатлар ман портфель тапшырылды. Акцияда редакциядынъ куллыкшылары, ногай шаирлери Магомет-Али Ханов, Джамиля Аманбаева катнастылар. «Шоьл тавысы» республикалык газетасынынъ бас редакторы Эльмира Кожаева эм ДР Язувшылар союзынынъ ногай секциясынынъ етекшиси Гульфира Бекмуратова Микаилга коьп ийги йоравлар айттылар. Шаир Джамиля Аманбаева окувшыга оьзининъ «Айлан, уршык» эм эртеги китабин савкатлады.
Тагы да бир кере «Балады мектебке аьзирле» деген акция ийгилик кишкейден басланатагынын ыспатлады. Сондай саваплык шарады озгаратаган инсанлардынъ аркасы ман балалар оьзлерин ялгыз тувыл деп сезедилер. Балады мектебке аьзирлев тынышлардан тувыл, сога коьре ата-анага
бу акция – салдарлы коьмек. Былтыр да Эльмира Кожаева редакция атыннан Микаилга мектебке барув алдында акшалай коьмек эткен. Микаилдинъ анасы, редакция куллыкшысы Зухра Ваисова баьрисине де разылыгын билдирди. Редакция коллективи эм ногай язувшылар секциясы бу аьдетти йыл сайын бардырмага токтастылар.
Бизим хабаршы.
Суьвретте: акция катнасувшылары.