Аьдемнинъ яшав оьмири. Сол аьр бир инсанга берилетаган зат. Кесек заман болжалы ишинде биз оьзимизге берилген берекеттен татамыз, туьрли аьдемлер мен йолыгысамыз, биревлери мен бактыларымыз бирге де болады…
Аьр кайсымызга берилген кысмет, соны биз оьтемиз, бизден сонъгылар да оьтееклер…
Бизим оьмиримизге согыс спецоперациясынынъ оьтуьви де келди. Согыс спецоперациясы, тарихтинъ кайсы бир кайгылы бетиндей болып, аьр биримиздинъ яшавымызда бир орын алып, юрегимизде бир ыз калдырады. Сол оьзгеристинъ катнасувшылары, бизим заманнынъ баьтирлери, олар уьйкен сыйга эм оьктемсуьвге тийисли, неге десе тек олар оьз йигитлигин, Аталыгы алдында алаллыгын коьрсетип, Элди коршалавга шыгадылар.
Ис борышларыма коьре, Ногай районымыздынъ туьрли авылларынынъ яшавшылары ишиннен Элди коршалавга шыккан, СВО оьтетаган Украина япсарларында йигитлерше ян берген ясларымыз акында да коьп язбага туьседи. Солардынъ бактылары бизге армаганда да кызыклы болады, аьрекетин аьли де бардыратаганларга савлык та тилеп турамыз. Уьстимиздеги йылдынъ басында мен Ногай районымыздынъ КараСу авылынынъ яшавшысы, оьз ыхтыяры ман контрактлы аьрекетин баслаган Сраждин Казбек увылы Кунтувганов акында язган эдим, оькинишке, яшав оьмири курманлык болганнан сонъ. Бу куьнлерде ол Йигитлик орденине тийисли болганын да эситтим. Элбетте, тийисли аьдемге савга берилмеге керек эди. Сол язылганнан кесегин келтирип, йигиттинъ байыр белгилерин эсинъизге салайым: «Сол баьтирлердинъ бириси, яшав оьмири Элди явдан коршалав уьшин курманлык болган – Сраждин Казбекувылы Кунтувганов. Ол – Ногай районымыздынъ Сылув-Тоьбе авылында тувган яс йигит. Балалыгы эм яслыгы болса, конъысы Карасу авылында оьткен. Йигиттинъ бала шагы суьйинишли эм завклы эди, неге десе сол элимизде тынышлы заманлар ман бирге келген. Карасу авыл орта мектебинде Сраждинди окытувшылар куьлемсиреп, дайым юзинде нур яйнаган бала этип эслеринде саклайдылар. Онынъ яслыгы да, бала шагы да оьз тенълериннен баскаланмайды. Мектебти окып битиргеннен сонъ, Сраждин Казбек увылы, заманы ман, Россия Аьскер сырасында оьзининъ эр
борышын толтырды. Амурский областининъ Сковородино каласындагы аьскер боьлигинде Сраждин рядовойдан тамада механик деген аьскер чинине дейим етисти. Оннан сонъ, баьри зат та яшав агымы ман кетип барды… Заман ман бирге абытлап, Ногай районымыздынъ коьплеген ясларындай болып, Элимиздинъ бас каласына ислемеге кетти. Соннан да бир неше йыл оьткенде, оьзининъ аьел наьсибин тапты. Сраждин мен Румия Кунтувгановлардынъ яс аьелинде кыз да, увыл да тувдылар. Соьйтип, заманлар да оьте бердилер. Аьел, аьрекет, балаларына суьйим, олардынъ келеектегиси акында ой…
2020- ншы йыл олар уьшин бек кайгылы болды. Тандыр саклавшы Румия яшавдан анъсыздан кетип калды. Сраждин балалары ман, оьзининъ ойлары ман эм кайгысы ман бирме-бир калды. Ама яшав деген сондай зат, аьр кайсы ерде йол шыгады. Каранъа туьнде алдынъда ярык янгандай болып коьринеди… Сол куьн онынъ яшав оьмири эки боьлинди: туьнегуьнги эм буьгуьнги…
Согыс спецоперациясы. Элимизге сондай кыйынлы шак…». Сраждин Казбек увылы Кунтувганов «Эл алдында борыш толтырув – киели» деген соьзлери мен СВО ерине куллык этпеге кеткен. 2024-нши йылдынъ увыт айынынъ 10-ншы куьнинде ол Россия Федерациясынынъ Коршалав министерствосы ман контрактлы иске кол баскан эди. Сол куьн ол ызгы кере оьзининъ ювык аьдемлери мен де аманласкан…
Эл, Аталык, Тувган ер, тынышлы яшав уьшин берилген яс ян… Бу куьнлерде онынъ анасына увылынынъ йигерли абытын коьрсеткен, баьтирлигининъ шайыты болган «Йигитлик ордени» тапшырылды. Ана юреги кайгыга толады, етим калган балалардынъ коьзяслары агадылар… Заман сувдай агады… Халкымызга ийги атын калдырган йигитлер уьшин биз де оьктемли боламыз. Сраждиннинъ топырагы яшар, аты, даны тарихте бир айырым орында да турар…
Г.Сагиндикова.