Авылхозяйство экономикадынъ маьнели бир тармагы болып саналады. Ол азык-туьлик товарларын аьзирлевде уьйкен яваплы орынды тутады эм элимиздинъ келимлерин арттырады. Аьлиги заманда авылхозяйство акында бир неше законлардынъ алынувы ман бу тармакты янъы оьлшемге шыгармага амал табылды. Сол зат халктынъ яшавын ийгилендируьвге каратылган куллыкларды да онъламага эп береди. Буьгуьнлерде элде уьйкен агропредприятиелери эм кишкей фермалар оьрленип баслаганлар.
Биз янъыларда Куьнбатар авыл ериндеги «Мансур» эгинши-фермер хозяйствосында конакта болдык. Сонынъ ерлеринде сол куьн куьзлик бийдайды шашув
ислери бардырылып туры эдилер. Бу хозяйстводынъ орынында коьп йыллар узагында алдынгысы «Куьнбатар» совхозынынъ бас койшысы Батирхан Мансуровтынъ кой кошарасы болган. Оннан сонъ койшылыкты мунда онынъ кедеси Амирхан юриткен. Аьлиги заманда бу КФХ-ды онынъ да кеделери, эки эгиз агалы-инилер
Фазиль мен Адиль Мансуровлар етекшилейдилер. Олар ман бирге мунда иниси Руслан да куллык этеди. Агалы-инилер баьриси де сол куьн оьзлерининъ эгин кырларында бийдай шашув ислери мен каьр шегип турганынынъ уьстине барып калдык.
Шашувды янъы баслаганлар, сол куьнге 100 гектар топыракка куьзлик шашыпты эдилер. «Эндиги де мунда 500 гектар ерге урлык шашылаяк. Топыракка туьсип турган урлыклар «Барыня» эм «Корона» деп аталадылар эм ийги урлыклар деп саналадылар», – дейди бу командировкады уйгынлаган Ногай район авылхозяйство управлениесининъ етекшисининъ орынбасары Яхья Караев. Мансуровлардынъ хозяйствосы – берк эм ийги дегенлердинъ бириси. Мунда 3 мынъга ювык ана койлар
сакланадылар, 215 тувар мал да бар, ем сакланатаган ангарлар, 100 малга деп этилинген уьйкен эм кенъ беслев майданы да курылган. Малшылар оьзлери туратаган уьйлеринде яшавга деп баьри онъайлыклар да эткенлер, тазалык йогары аьлде тутылады.
Мансуровлардан коьп узак болмаган ерде бас койшы Магомед-Расул Магомедовтынъ малшылык котанлары орынласкан. Магомедовлар асылы ман Акуша
райондыкы, олардынъ уьйкен атайы Ахмед-Гаджи тап совет заманларыннан алып «Куьнбатар» совхозында бас койшы болып ислеген. Оннан сонъ увылы Курси, ол мунда тувып оьскен, атасыннан сонъ Ногай шоьллигинде малшылык аьрекетин юриткен. Эндигиси буьгуьнлерде онынъ да кедеси МагомедРасул аталарыннан калган
кой багатаган ярликти колыннан туьсирмей келеди. Магомед-Расул бизди оьзи Тереклиге келип, кошарасына аькетти. Мунда сол куьн онынъ малшылары койларга белги салып туры эдилер.
Хозяйствода аьлиги заманда 950 койлар, 250 тувар мал оьстириледи. Магомедов аьр йыл сайын мал союв цехине койлардынъ эм бугалардынъ этлерин сатады. Соьйтип ол Россия Президенти эм Оькимети белгилеген элимизди азык-туьлик пен канагатлав программасын толтырады. Келип турган ис байрамы ман Мансуровларды, Курсиевлерди эм баьри де район фермерлерин, арендаторларын, байыр ярдамшы хозяйстволар иелерин кутлаймыз, оларга патшалыгымызга керекли куллыгында уьйкен етимислерди, мол онъысларды эм алал берекетти йораймыз!
М-А.Ханов.
Суьвретте: Мансуровлар: Фазиль, Адиль эм Руслан куьзлик бийдай шашувда.
