Кырк кийик айынынъ 24-нши куьнинде ногай халкынынъ белгили шаири, журналисти, Россия Журналистлер эм Язувшылар союзларынынъ агзасы Магомет-Али Ханов оьзининъ тувган куьнин белгилейди. Соны ман байланыста Ногай районынынъ Терекли-Мектеб авылынынъ орталык китапханасында «Ашык микрофон» шарасы шаирди шакырувы ман озгарылды. Бу йолыгысты китапхана куллыкшылары «Шоьл тавысы» республикалык газетасы ман биргелесте
оьткердилер. Магомет-Али Юнус увылы Ханов пан йолыгыста район китапханалар етекшилери, поэзия суьювшилери, ногай язувшылар, шаирдинъ ис йолдаслары катнастылар. Китапханада язувшыдынъ китаплерининъ выставкасы уйгынланган, онынъ яшав эм яратувшылык йолы акында видеоролик коьрсетилди.
Шарады Нариман авылынынъ китапханасынынъ етекшиси Айгуль Батырова юритти. Ол язувшы, журналист акында хабарлады, онынъ ятлавларын окып, соравлар
берди. Магомет-Али Юнус увылы кайбир ятлавы, хабары кайзаман эм не зат пан байланыста язылганы акында хабарлады. Китапхана куллыкшысы Сапихан Курпаева шаирдинъ «Эдиге эм Витовт» деген поэмасыннан уьзиклер окыды, сондай куьшли шыгармады язганда, кайдай сезимлер янында толкынласканы акында сорав
берди. Бу ерде айтып озув керек, аьлиги заманга Магомет-Али Ханов тарих темасын коьтерип, поэма язган биринши шаир болады. Оьз поэмасында ол Эдигединъ
согыс касиетлерин ашык кепте коьрсетеди. «Шоьл тавысы» республикалык газетасынынъ бас редакторы Эльмира Юнус кызы Кожаева М-А.Хановтынъ аьрекети акында хабарлады, оны билимли, критикалык макалаларды язатаган журналист экенин белгиледи. Политика эм авылхозяйстволык боьлигининъ редакторы М-А.Ханов аьлиги заманнынъ оьткир соравларын газета бетлеринде коьтереди. Керек ерде табылатаган инсан, оьзининъ акыйкат соьзин калемининъ астыннан шыгарады эм куьналилерди айыплайды. Соьйтип онынъ акында авылымыздынъ ямагатшылары айттылар, олар коьп кере паркта курылысларды тайдырув ниет пен МагометАли Юнус увылына коьтергишлев излеп келгенлер, бир куьн де «йок» деген соьзди эситпегенлер.
Онынъ иси акында ис йолдаслары шыгып соьйледилер. Магомет-Али Хановтынъ яратувшылык йолы акында калемдаслары да айттылар. Шаир, Россия Язувшылар союзынынъ агзасы Джамиля Аманбаева язувшы ман бирге ислеген йыллары акында айтты, буьгуьнлерде де онынъ маслагаты, соьзи ога маьнели экенин белгиледи.
Мен коьплеген йыллар ислеймен оны ман. Сол йыллардынъ ишинде болган оьзгерислердинъ куванышын да, кайгысын да бирге оьтип келемиз. Сол инсанларды бирлестирмей болмайды.
Магомет-Али – талаплы язувшы, онынъ ятлавлары, хабарлары аьдемнинъ юрегине тиймей болмайды. Коьп окыйтаган, терен билими бар журналист, язувшы, ол
оьз халкынынъ тамырларын биледи, язган заманда, сол билимине таянады. Мен онынъ ятлавларын орыс тилине коьширемен. Шарага йыйылганларга «Сталинградта» деген ятлавын орыс тилинде окыдым.
ДР ат казанган маданият куллыкшысы, Орталык китапханалар тармагынынъ етекшиси Сабират Казгерей кызы Абубекерова язувшыдынъ яратувшылык йолы
акында айта келе, ога кызыклы соравлар берди. Китапхана куллыкшылары Магомет-Али Хановтынъ ятлавларын окыдылар, коьплеген соравлар бердилер. Солай
ок язувшыдынъ кужырлы хабарлары акында айтылды. Йолыгыстынъ ызында автор солардынъ бирисин окыды.
Быйыл Магомет-Али Ханов оьзининъ тувган куьнин онынъ поэзиясын суьювшилер арасында карсы алды. Китапхана куллыкшылары оны кутлап, гуьл байламын
тапшырдылар. Шара коьтеринъки коьнъилде оьтти. Биз тагы да поэзиядынъ аьлемет эм бай дуныясы ман ювык таныс болдык.
Г.Бекмуратова,
ДР Язувшылар союзынынъ ногай секциясынынъ етекшиси.
Суьвретте: шарадан коьринис.
