Янъыларда Ногай маданият куьни Ямал-Ненец автономлы округындагы Янъы Уренгой каласында шатлыклы аьлде уйгынланып оьтти. Миллет маданият
орталыгында сол куьн байрам ногай халкынынъ бай маданият асабалыгын баалайтаганлардынъ савлайын да бирге йыйды. Шарады Янъы Уренгой
каласындагы «Ногай Эл» миллет-маданият автономиясы уйгынлаган эди. Сол куьн байрамга йыйылганлардынъ, белгили ногай суьвретшимиз Алибек Койлакаевтинъ терен маьнели суьвретлериннен, ногай халк язувшыларынынъ, шаирлерининъ дуныя ярыгын коьрген туьрли китаплериннен туьзилген выставкасында болып, онынъ бай иштелиги мен таныспага, авторлары акында коьп билдируьвлерин билмеге амаллары болды. Шарага келгенлерди китаплердинъ авторларынынъ яратувшылыгы ман, оьзининъ язган шыгармалары ман кыскаша Россиядынъ Язувшылар эм Журналистлер союзларынынъ агзасы Альберт Тамакаев таныстырды. Ногай адабиятына бет беруьвшилер шаирдинъ бир неше ятлавларын да яттан окып эситтирдилер. Байрам катнасувшылары язувшыга кызыксынган соравларын берип, керекли
явапларын алдылар.
Сол куьн миллет маданиятлар орталыгында туьрли станциялар аьрекет эттилер. Биревинде шатраш ойынын суьювшилери оьз билимлери мен сынаспага, баскаларында конаклар туьрли оьрнеклер дуныясы ман танысып, оьзлерине де тигип карамага, уьшинши ерде кыскаяклыларга уршык пан йипти ийирип, аьвелги яшавдынъ дуныясында кесек заманга кезинмеге де амал берилди.
Сол куьн шатлыклы байрамга келген балаларга эм ясларга, тек ногай миллет ойынлары ман танысып калмай, «Перспектива» мектебининъ физкультура сабагыннан окытувшылары Бегали эм Агали Койлакаевлердинъ етекшилиги мен катнасып, ойынларга шалт кирисип, бийик етимислерин коьрсетпеге де бакты буйырды.
Байрамга келген конаклардынъ коьнъилин оьнерли ногай йырлавшылары Ибрагим Карасов, Фарида Шомаева, солай болып, Махмуд Унежевтинъ етекшилеви мен «Горные вершины», Рустам Байтищевтинъ баславы астында «Нур» биюв ансамбльлерининъ катнасувшылары йыйылганларды оьз оьнерлери эм усталыклары
ман таныстырдылар. Байрам катнасувшылары оьзлери де миллет биювине, ортада карс кагып, белсенли киристилер.
Сыпыраларда туьзилген ногай миллет аслары да оьзинше байрамды ярасыкламай болмады. Сол байрам куьн, халкымыздынъ туьрли аслары, зияпетлери мен ийилип толган берекетиннен аьр ким де татып, калемпири, бурышы кокып шыккан, уьстинде сары майы калкыган ногай шайыннан увыртлап калмай, Янъы Уренгой
каласында яшайтаган баска миллетли яшавшыларга халкымыздынъ бай асабалыгы, айтпага, адабияты, маданияты, санияты, миллет ойынлары, кол оьнершилиги мен
ювык танысып, халкымыздынъ тарихи акында билимлерин байытпага, кенъейтпеге бакты буйырды.
Соьйтип, Ногай маданият куьнине багысланган шара кызыклы, пайдалы эм йогары коьнъилде озып, оьз тувган ериннен коьп шакырымлар алыс болган ердеслеримиздинъ юреклеринде бай миллет асабалыгы уьшин оьктемлик тувдырып, оларды сувык Янъы Уренгой каласыннан ойларында йылы тувган ерине – шешекейли ногай шоьлине кесек заманга аькетти.
Г.Нурдинова.
Суьвретте: байрамнан коьринис.
