Карагаш ногайлары маданият асабалыгынынъ саклавшылары болып келедилер.
Астрахань областининъ Приволжский районынынъ Растопуловка авылыннан «Дослык» фольклор-этнографиялык ансамблин мен коьптен таныйман эм олардынъ яратувшылыгы ман сукланып келетаганыма да аз заман болмайды. Ол – Астрахань областининъ карагаш ногайларынынъ миллет маданият асабалыгын аявлап саклап эм оьрлендирип келетаган яратувшылык коллективлерининъ бириси. Ансамбль карагаш ногайлардынъ халк аьдетлерин саклавшысы Базира Акманбетова ман 1988-нши йылда туьзилген.
Кыскаяклы сол аьлемет яратувшылык коллективин 30 йыллар бойы етекшилеп калмай, ога буьгуьнлерде де яратувшылык ягыннан демевлигин этип келеди.
Аьлиги заманда ансамбльди Зунфира
Мурзалиева етекшилейди. Ис коллективи аьвелги ногай аьдетлерин кайтадан яшавга эндируьв уьстинде белсенли каьрлейди. Ансамбльдинъ репертуарына сарынлар, ис эм лирикалык йырлары, баска болып, аьел аьдетлери, ерли макалаларына негизленген фольклор программалары, саз алатында ойнав анълары киргенлер.
Ансамбль район эм область бойынша, айтпага, «Навруз», «Сабантой», «Коьпмиллетли Астрахань», Балыкшыдынъ куьнине багысланган байрамларында, шараларында белсенли ортакшылык этеди. Ол савлайроссиялык эм область бойынша ярыслардынъ лауреаты атын да тийисли юритип келеди.
Расул Шугаипов.
Суьвретте: «Дослык» фольклорэтнографиялык ансамблининъ катнасувшылары.