Саьбийлердинъ уьстинликлери ата-анага эм окытувшыларга – уьйкен куьез. Бала баьрисине де ортак. Оьнерли, билимли окувшылардынъ акында эситсек, биз де
суьйинемиз. Нурислам Отегенов Ленинаул авылынынъ мектебинде биринши класстан алып окыйды.
Аьлиги заманда ол 10-ншы классынынъ окувшысы, сол йыллардынъ ишинде оьзин тынълавлы, билимли, оьнерли окувшы этип коьрсеткен. Баслапкы класслардан алып тек «доьрт» пен «беске» окыйды. Суьйикли деп география, биология, химия, физика сабакларын санайды. Йыл сайын Нурислам район, мектеб бойынша озгарылатаган олимпиадаларда, конкурсларда катнасады, баргылы орынларды алады.
Класста ерли самоуправлениесинде Нурислам окув секторын басшылайды, баьри шараларда катнасады – волейбол эм футбол командаларга киреди, согысспорт «Зарница» ойынында ортакшылык этеди. Ол оьзининъ ийги уйгынлав сулыбын «Эртегилер» КВН проектинде коьрсетти. Баскалай, Нурислам эркин куьрес, атлар
спорт кеби мен кызыксынады.
Бирге окыйтаган тенълери Нурисламды танъ, бавырмалы деп биледилер. Окытувшылар оны окымыслы, оьз ойы да, ниети де бар окувшы деп таныйдылар.
Нурислам Отегенов окув йыллары ишинде коьплеген конкурсларда, ярысларда, олимпиадаларда баргылы орынды алып, тувган мектебининъ атын данъклаткан. «Космосты кезуьв», Савлайроссиялык география бойынша олимпиада, «Таза сув акында каьр шегуьв», «Эдаптынъ алтын йорыклары», «Ак ладья», «Меним
киши Аталыгым – табиат, маданият, этнос» конкурсынынъ район эм республикалык кезеги эм сондай баска ярысларда Нурислам баргылы орынларды алган. Янъыларда Нурислам Отегенов республика бойынша оьткен «муай-тай» бойынша турнирде биринши орынга тийисли болды.
Аьлиги заманда Нурисламнынъ бас мыраты – окувды ийги этип кутарып, оьзи сайлаган кеспиди байырламага. Яс кайсы исти сайласа да, оьз Элине, тувган ерине пайда аькелмеге шалысып яшар эм ислер деп шекленмеймиз. Нурисламга окувында да, бактысында да баьри яхшылыкларды йораймыз.
Г.Бекмуратова.
Суьвретте: Н.Отегенов.