Заман тарихтинъ бетлерин актарады, куьнлер, йыллар озадылар. Уллы Аталык согысынынъ йыллары да узакка кетедилер, ама не шаклы заман озса да, оьз ерин каты явдан коршалаган халкымыздынъ баьтирлиги мутылмайды эм оьмирлер мутылмас.
Уьстимиздеги 2025-нши йылдынъ 9-ншы октябринде Уллы Аталык согысынынъ маьнели деген урысларынынъ бириси – немец-фашист аьскерлерин Кавказ уьшин согысувда бузгышлаганлы 82 йыл болады.
Бу оьзгерис Совет Союзынынъ тек стратегиялык енъуьви болып калмай, Аталык коршалавшыларымыздынъ баьтирлигининъ эм патриотлыгынынъ белгиси болды.
Бу куьнлерде Нариман авылынынъ орта мектебинде Кавказ уьшин согысувда немец-фашист аьскерлерин совет аьскерлери бузгышлаган куьнине багысланып шаралар озгарылдылар.
Тарих эм обществознание сабакларынынъ окытувшысы Еннетхан Салимсултановна Эсиргепова «Кавказ уьшин согысув» деген темага 9-ншы класста эрлик дерисин озгарды. Шара оьсип келеяткан несилди патриотлык яктан тербиялавга эм Уллы Аталык согысы йылларында совет халкынынъ баьтирлиги акында тарих эстелигин саклавга каратылган эди. Окытувшы балаларга Кавказ уьшин согысувдынъ барысы, «Эдельвейс» планы, Германиядынъ Кавказга баскыншылык этуьвининъ себеплери, совет аьскершилерининъ баьтирлерше согысувы акында хабарлады.
Дерис барысында окувшылар оьзлерининъ Уллы Аталык согысында катнаскан уьйкен атайлары акында да айттылар. Бу куьн согыс спецоперация озып турган ерде сол ветеранлардынъ уныклары эм немерелери уьйкен атайларынынъ йоллары ман барып, нацизм мен куьресетаганын да белгиледилер.
11-нши класс окувшылары ман окытувшы Увылхан Исмаиловна Эсенгельдиева «Отстоим Кавказ» деп, класс саьатин озгарды. Ол деристи А.Твардовскийдинъ ятлавы ман ашып, согыс йылларда совет аьскершилерининъ фронтларда эм совет халкынынъ тылда коьрсеткен йигитлиги акында кызыклы хабарлады. Окытувшы Караногай районыннан давга 2500 аьдем кетип, олардынъ тек 584-ти кайтканын да айтты. – Уллы Аталык согысынынъ ветеранлары биз оларды эсимизде саклаган шаклы яшаяклар, – деп окувшыларга олардынъ тынышлы яшавы уьшин оьзлерин аямаган ветеранлардынъ йигитлигин эслеринде сакламага шакырды. Сонъ окувшылар белгиленген темага аьзирлеген презентациясын коьрсеттилер.
Мундай дерислер, соьзсиз, окувшыларда оьз Эли уьшин оьктемликти эм онынъ озганына сыйды оьстируьвге себеплик этеди.
Н.Кожаева.
Суьвретте: деристен коьринис.