«Талаплы аьдем – баьри ерде де талаплы» деп халк арасында босына айтылмаган. Ол оьзине Кудай ман савгаланган билимди куьннен-куьнге арттырмага, кенънен кенъ йолга шыкпага шалысады. Сол зат яшав ман ыспатланып келеди. Оннан сонъ, яшай келе, неше кере де «Болаякты балалыкта таныйсынъ» деген соьзди де коьп кере эситкенмен. Ушыны да, акыйкатлыгы да бар…
Аьлиги соьзим – юзинде нур ойнаган, коьзлеринде куьн саьвлеси яйнаган бир аьруьв ногай кыз акында. Мен оны ман ийги таныс деп айтып болмайман, бир кере анасы ман кетип бараятырганын коьрдим, дурысын айтсам, олар меним алдыма карап келдилер, анасын таныйман, сога коьре аманластык, аьлимиздикуьнимизди сорастык, бала да анасы саламласканды коьрип, мени келип кушаклады, сол да нединъ акында айтады, меним ойыма коьре, тербия. Аьлиги заманда таныган яс аьдемлер арасында, коьзинъе карап, саламын бермейтаганлар саны айлак коьп…
Соьзимди сол таныстырмага суьйген кызга кайтарайым. Малика Эльмурат кызы Хасбулатовадынъ аты коьп ерлерде ийгилик пен айтылады. Ногай районымыздынъ Билимлендируьв тармагынынъ коьплеген Интернет сайтларында бу кыздынъ енъуьвлери акында айтылганын коьремен. Оьткен окув йыл Маликага уьстинликли эди. Ол тек Ногай районымыз тувыл, республикалык кезекте оьткен коьплеген шараларда енъуьвши эм савгалы орынларды бийледи.
Малика – бек оьнерли кызалак. Ол А-Х.Джанибеков атында орта мектебининъ 4-нши классынынъ окувшысы болады. Мектебте ол ортакшылык этпеген
шаралар йок десем де оьтирик тувыл. Кыскаша айтканда, Малика – мектебтинъ белсенли окувшыларынынъ санында. Йогарыда айтканымга коьре, ога оьткен окув йылы бек уьстинликли эди. Артта «Балалардынъ коьзлери мен» суьвретлер конкурсы, мунда ол «Портрет» номинациясынынъ призеры эди, республикалык «Первоцвет» шарасы, мунда да Малика савгалы орынды бийлеген эди. Россияда Коршалавшы йылына багысланып оьткерилген «Енъуьв байрагы» яратувшылык шарасы да талаплы окувшы уьшин уьстинликли болды, сол да онынъ енъуьвлерине бир савга косты. Маликады суьйиндиргени болса, «Наш орлиный Дагестан» яратувшылык шарасы эди. Мунда ол Ногай районымызда аьрекетин бардыратаган Балалар яратувшылык уьйининъ катнасувшысы болып, окытувшысы Салима Джамалдин кызынынъ етекшилеви астында кол оьнерлиги мен аьзирлеген кумганын коьрсетип, енъуьвши деген атка тийисли болган.
Аьлиги заманда билимге терен караган, кызыксынувларын кенъ этпеге суьйген балаларымыз аз тувыл.
Заман да сондай, аьлиги заманнынъ баласында мырсатлар коьп. Солай болганда, берилгенди кулланып тек болайык. Алдыда Маликага тек уьстинликлерди,
тагы да коьп енъуьвлерди йораймыз.
Г.Курганова.
Суьвретте: М.Хасбулатова.
