Ногай районы Дагестан Республикасынынъ сырасына киргеннен бери бизим мал отлакларда ерли малшылар ман бирге республикадынъ баска районларыннан совет йылларда келип биздеги совхозларда бас койшылар болып туьрли миллетли аьдемлер ислегенлер. Буьгуьнлерде эндигиси район еринде олардынъ балалары эм уныклары куллык этедилер.
Койшы Магомедовлар асылы ман Акуша райондыкы, олардынъ уьйкен атайы Ахмед-Гаджи тап совет заманларыннан алып «Куьнбатар» совхозында бас койшы болып ислеген. Оннан сонъ увылы Курси, ол мунда тувып оьскен, атасыннан сонъ Ногай шоьллигинде малшылык аьрекетин юриткен. Эндигиси буьгуьнлерде онынъ да кедеси Магомед-Расул аталарыннан калган кой багатаган ярликти колыннан туьсирмей келеди.
Магомед-Расул бизди оьзи Тереклиге келип, кошарасына аькетти эм кайтарып та аькелди. Мунда сол куьн онынъ малшылары койларга белги салып туры эдилер. Хозяйствода аьлиги заманда 950 койлар, 250 тувар мал оьстириледи. Магомедов аьр йыл сайын мал союв цехине койлардынъ эм бугалардынъ этлерин сатады. Соьйтип ол Россия Президенти эм Оькимети белгилеген элимизди азык-туьлик пен канагатлав программасын уьстинликли толтырады.
Магомед-Расул оьзи де Ногай шоьллигинде тувып оьскен яс аьдем, мунда онынъ ис аьрекети, яшавы, аьели эм энъ де маьнелиси: мунда оны таныйдылар эм сыйлайдылар.
М.Юнусов.
Суьвретте:Фермер МагомедРасул Магомедов.