Йылдан йылга, коьп заманлардан бери патриотлыктынъ, ян куьшлиликтинъ эм шыдамлыктынъ белгиси болып келген, Уллы Аталык согысынынъ ветеранлары аз бола береди. Мине неше йылдан бери Енъуьв куьнин бизим Ногай район яшавшылары ветеранларсыз белгилейдилер. Фашистлердинъ
авыр сынавларын оьткен ветеранлардынъ орынына бизим заманнынъ баьтирлери – согыс спецоперация катнасувшылары келедилер.
Бу куьнлерде оьзининъ уьйкен атайынынъ аьскер йолы ман согыс спецоперация катнасувшысы, Шешен Республикасынынъ Шелковской районынынъ Каршыга авылынынъ яшавшысы УланБек Кенжикаев барады. Ол кишкей заманнан алып оьзининъ уьйкен атайынынъ Уллы Аталык согысы,
аьскер йолдаслары ман байланыслы хабарларын тынъламага суьйген эм мектебте окыган йыллардан алып Эл алдында эр борышын толтырув акында мырат эткен. Аьли де кишкей эркек бала болып ол оьзи яшаган Эл акында ойлаган, онынъ орманларын, тавларын, тенъизлерин эм уьйкен калаларын коьз алдына аькелген, онынъ кишкей юрегинде Аталыгына каратылган уьйкен суьйим яшаган.
Улан-бек Абдулкерим увылы аьскерди Москва областинде автомобильный батальонында оьткен, сонда оьзин исине алал эм яваплы аьскерши этип коьрсеткен.
Онынъ ата-анасы увылына ийги тербия бергенлери уьшин аьскер боьлигининъ командириннен разылык хат алганлар. Сол онынъ атаанасынынъ юрегин оьктемликке толтырып, кувандырмай болмады. Соьйтип яслай бизим йигит коьрим болып келген.
Улан-бек Кенжикаев аьскерден уьйине кайтып, доьрт ай кеткен сонъ, РФ Министерствосы ман контракт басады эм соннан бери, 2009-ншы йылдан алып, Россия Савытлы Куьшлеринде куллык этеди. Согыс спецоперациясы басланганша бизим ердесимиз Сирийская Арабская Республикасына командировкага йиберилген. Сирияда Уланбек Кенжикаев оьзлерининъ уьйлерин амалсыздан таслап кеткен аьдемлерди коршалаган, уьйлери бузылган, кыйын аьлге калган яшавшыларга гуманитарлык ярдамын пайлаган. Сирияда гуманитарлык ярдамын пайлав ак ниетли ис те
бек кыйынлы, такыйка сайын яшавынъды сынавга салув ман байланыслы болып барганы да бизге белгисиз тувыл. Улан-бек Кенжикаев согыс
спецоперациясы басланган биринши куьннен алып аьскер борышларын толтырады. Элин эм патшалык кызыксынувларын коршалавда коьрсеткен эрлиги уьшин Уланбек Кенжикаев «За храбрость», «За боевые отличия», Суворовтынъ медальлери мен савгаланган. Уьш йылдынъ ишинде ол согыс спецоперациясы озган ерде коьпти коьрген эм коьптен оьткен: авылларды эм калаларды нацистлерден босаткан, аьскер йолдасларын йойыткан,
оьз яшавын сынавга салып оларды куткарган. Ама ол сонынъ акында бир зат та айтпага суьймеди, неге десе бизим йигерли йигитлер соьзсиз коршалайдылар, явды согадылар, куткарадылар эм ерли тынышлы яшавшыларга ярдам этедилер.
Бизим йигитлер тек Эл алдындагы эр борыштынъ акында айтпага боладылар. Соьйтип Улан-бек Абдулкерим увылынынъ «Биз болмасак ким коршалар уллы Россияды. Мен оьктемсиймен оьз элим уьшин аьрекет эткениме, онынъ япсарларын эм кызыксынувларын коршалаганыма» деген соьзлери онынъ Элине каратылган оьлшемсиз, шетсиз суьйими акында айтадылар. Эли уьшин, Атлагымыздынъ мынълаган йигитлери сырасында ол эрлик, баьтирлик коьрсетеди, явды каты согады.
Сакласын бизим йигитлерди дав майданларда Кудай! Оларды уьйлеринде ювык аьдемлери, кардашлары Енъуьв мен куьтедилер. Уланбек Абдулкерим увылындай бизим заманнынъ баьтирлери акында аьли де, савлай элимиздинъ баьри халклары коьптен куьтетаган Енъуьвден сонъ да, хабарлар язылар,
дерислерде айтылар, олардынъ уьлгисинде оьсип келеяткан несил тербияланар. Енъуьв бизики болар!
Нурият Кожаева.
Суьвретте: Улан-бек Кенжикаев.
