Быйыл 27-нши ноябрьде Дагестан Аькимбасы Сергей Меликов республика яшавшылары ман эндигиси 5-нши кере оьзининъ тувра линиясын оьткереек. Сол шараларды бизим ерде баславшы эм соларды аьр йыл сайын оьткеруьв уьшин ол оьзи шалысатаганын аьр биримиз де билемиз.
Быйылгы тувра линияда да мынълаган дагестаншылар катнасаяклар деп куьтемен эм олардынъ аьр бириси регион басшысына оьз калалары ман авылларынынъ маьнели маьселелери акында соравлар берееклер, Меликов пан бирге соларды ойласаяклар.
Регион етекшиси яшавшылар ман тувра линиясын оьткеруьви мен аьр бир дагестаншыды йыллап йыйналган маьселелерди ойласувга эм шешуьвге даьвлендиреди, «меним уьйим шетте» деген аьлден эндигиси шыкпага заман келгенин билдиреди эм белсенлик, ашык гражданлык сезимин, акыланъламлык коьрсетпеге, биз тек бирлесип оьткен йыллардынъ катып калган осал ой-карасларыннан босанмага боламыз деп шакырувын белгилемеге суьемен. Мен сол затты тувра линиядынъ бас маьнеси деп санайман эм быйылгы сондай шарада алдынгыдан да артык гражданлар катнасарлар эм былтыргыдан да соравлар берерлер деп сенемен. Меликов оьзи, эгер ким ди биревдинъ соравы тувра эфирде айтылмаса, соны «столдынъ яювынынъ астына ясырдылар» деп ойламага керек тувыл, сол сорав да ойласылаяк эм соравды берген аьдемге тийисли явап та кайтарылаяк деп белгилегенин маьнели деп санайман. Ол зат республика етекшисининъ оьз куллыгы эм патшалык, солай ок ерли-еринде муниципаллык власть
органларынынъ куллыгы уьшин де терен яваплык тутувын шайытлайды.
Регион басшысына берилген коьп соравлардынъ ишинде алдынгы йыллардагындай болып коммуналлык хозяйство службаларынынъ аьрекети, социаллык, экономикалык оьрленуьв, курылыс эм капиталлык ярастырув, халкты сапатлы медицина эм социаллык ярдамы ман канагатлав, газ эм электричествога, азык-туьликке баалардынъ токтавсыз оьсуьви эм кыйын ак пан пенсиядынъ оьлшемининъ солардан кери калувы эм с.б. соравлар орта орынларды алар деп ойлайман.
Маьнели соравлардынъ арасында, бир соьзсиз де, Сергей Меликов дайым да оьзи эс берип келетаган СВО катнасувшыларын эм олардынъ аьеллерин колтыклав, иске ерлестируьв, балаларын республика эм элимиздинъ орта эм йогары окув ошакларына окувга йиберуьв соравлары да тувра линия барысында белгиленер.
Дагестан Аькимбасы ман халк арасында оьткерилмеге каралатаган тувра линия шарасы келеек юма республикадынъ ямагатполитикалык яшавынынъ
энъ маьнели амалламасы болаягына эм сол шара белсенли, пайдалы эм етимисли аьлде оьтеегине сенемен.
М-А.Ханов.
