Ногай район администрациясынынъ пресс-службасы билдируьвине коьре, СВО катнасувшысы Арсланбек Азизов акында эсти оьмирлетуьв ниет пен онынъ йигитлигине эм эрклигине сый этуьв белгиси эсабында Карагас авылдынъ бир орамына онынъ аты тагылган.
ДР-нынъ Ногай районында оьткен сол эстеликли оьзгериске багысланган шатлыклы шарада власть органлар эм ямагат организациялар ваькиллери ортакшылык эттилер: ДР Ямагат палатасынынъ агзасы, Ногай районынынъ Хатын-кызлар советининъ председатели Асият Манкаева, «Защитники Отечества» патшалык фондынынъ социаллык координаторы Аскерхан Межитов, Ногай район администрациясынынъ ислерин юритуьвшидинъ
орынбасары Алия Кусегенова.
Солай ок бу шарада «Яслык» орталыгынынъ алдышы специалисти Гульжанат Каракаева, Карагас авыл етекшиси Мурат Капашов, Арсланбек Азизовтынъ ювыклары эм кардаш-тувганлары, билимлендируьв учреждениелер окытувшылары, СВО катнасувшыларынынъ аналары эм хатынлары, авыл яшавшылары катнастылар. Арсланбек Азизовтынъ эстелигине багысланган шатлыклы шарады Карагас авылынынъ СДК директоры Алимет Аблезова ашты эм юритти. Шара барысында Арсланбектинъ яшавы эм баьтирлиги акында коьп затлар айтылды. Ерли администрация ваькиллери эм авыл яшавшылары онынъ анасы Борамбике Азизовага оьз кайгырувларын билдирдилер. Арсланбектинъ иниси Анварбек эм карындасы Марина
баьри йыйылганларга оьз разылык соьзлерин караттылар. Белгилев керек, Анварбек Азизов та солай ок согыс спецоперациясында ортакшылык этеди.
Баьтирдинъ эстелигине бир такыйга уьндемей турдылар, сонъ Арсланбек Азизовтынъ мемориальлик тактасы туьбине шешекейлер байламлары салынды.
Арсланбек Азизовтынъ эстелигине аталган орамын ашылув белги эсабындагы лентады баьтирдинъ акасы Янибек Азизов эм карындасы Марина Азизова кестилер.
Арсланбек Азизов, асылы ман Карагас авылыннан, мектебте окув йылларыннан алып оьзин нызамлы, белсенлиги арткан аьдем этип коьрсетип келген. Мектебти битиргеннен сонъ, ол аьскерлик службасы ман каьрлеген. Оьз яшавын Тувган ерин коршалавга багысламага токтасып, ол контракт беркитуьв мен Чечняга йиберилген. Сонъында ога Сирия Республикасында аьскерлик борышларды толтырмага туьскен. Службасы кайда оьтсе де, оны коркынышсыз, дайым да алды сырада болмага аьзир аьскерши деп билгенлер. 2019-ншы йылда Арсланбек Азизов службасын оьтуьвге Самара областининъ Рощинский поселогындагы аьскерлик боьлигине йиберилген. Мунда сонъында онынъ акында эсти оьмирлетуьв ниетте Баьтирдинъ партасы ерлестирилген.
СВО еринде ол БТР-82А наводчиги эсабында куллык эткен. 2022-нши йылдынъ май айында ол явдынъ куьллелериннен каты яраланган. Эмленгеннен
сонъ, БПЛА ман байланыста уьйренуьвлерге йиберилген эм тагы да алдышылыкка кайткан.
Аьскерлик службасы йылларында Арсланбек Азизов коьплеген медальлерге тийисли этилинген: «Участнику военной операции в Сирии» (2021-нши йыл). «За боевые отличия» (2022-нши йыл), Суворов медали (2022-нши йыл), «За отличие в военной службе III степени» (2022-нши йыл).
Арсланбек Азизов ДНР-дынъ Авдеевка яшавшылар пунктында согыс борышларды толтырувда 2024-нши йылдынъ 1-нши августында ян берген. Россия Федерациясынынъ Президентининъ 2024-нши йылдынъ 5-нши августында кабыл этилинип алынган Указы ман оьлгеннен сонъ Баьтирлик орденине тийисли этилинген.