Республикалык «Шоьл тавысы» газетасынынъ редакциясынынъ коллективи согыс спецоперациясынынъ катнасувшысы Алавдин Тенизбаев пен аьдетли йолыгыс озгарды.
Алавдин ДР Ногай районынынъ Червленные Буруны авыл яшавшысы, СВО басланатаган йылдынъ биринши, 24-нши февраль, куьниннен алып сонынъ ишинде буьгуьнге дейим ортакшылык этеди.
Йолыгысты баслаятып, газетадынъ бас редакторы Эльмира Кожаева СВО катнасувшысын коллектив пен таныстыра келип булай деди:
– Сол эсимизден таймайтаган 2022-нши йылдынъ 22-нши февралинде элимиздинъ басшысы Владимир Путин Украинада туьзилген аьллердинъ оьткирленуьви мен байланыста баьри де айтылган аькимлерди йыйнап кенъес этти. Эки куьннен сонъ 24-нши февральде СВО басланды. Сол куьннен алып бизим йигерли ердесимиз Алавдин де сонда йигитлерше катнасып келеди эм биз буьгуьн йолыгысымызга оны сыйлы конак этип шакырганмыз.
Алавдин оьзи эм согыс спецоперациясы акында коьп соьзли болмай, кыскаша хабарлады.
– Крымга бизди бир ай алдын аькеттилер. СВО басланганша биревимиз де сонынъ акында билмегенмиз. Тек сол 24-нши февраль куьн эртен «Z» деген белгилер ясалып басланганда анъладык. Биз Новокаховка, Херсон, Чернобаевка аэропортка дейим бардык. Сонда бир юма турганмыз. Соннан
Кривой Рогка карап НовоАлександровка деп бир кала бар эди, сонда барып турдык кесек заман. Бир ай турган сонъ, бизди кайтардылар эм Запорожьеге аькелдилер. Биринши куьнлер авыр болдылар, март ай болса да сувык эди, 20 градуска дейим аяз… Баьримиз де аякларымызды уьситтирдик. Ас
яктан да баслапкы куьнлерде канагатланув кыйын эди.
Аьлиги заманда бу яктан аьллер ийги демеге боламан, – деди Алавдин. Ол СВО-да Росгвардиядынъ 102-нши бригадасынынъ сырасында водитель
болып ортакшылык этеди. Аьлиги заманда Алавдин Тенизбаев оьз йолдаслары ман бирге Запорожье областинде согыс борышларын толтырады. Янъыларда отпускка тувган уьйине келген. Анасы – Галима Червленные Буруны авылындагы маданият уьйинде ислеген. Атасы – Алимжан коьп йыллар узагында «Червленные буруны» патшалык заводында водитель болып куллык эткен.
А.Тенизбаев редакция куллыкшыларынынъ соравларына яваплады. Йолыгыстынъ ызында газетадынъ етекшиси Эльмира Кожаева ога коллектив атыннан разылык билдирди.
М-А.Юнусов.
Суьвретте: СВО катнасувшысы Алавдин Тенизбаев редакция куллыкшылары ман йолыгыста.