Кизляр районынынъ Огузер авылында Маданият уьйининъ алдында согыс спецоперация барысында янлары курман болган авыл яшавшыларынынъ эстелигин оьмирлетуьвге багысланган шара уйгынланып озды. Заур Рамазановка токтастырылган мемориаллык тактасынынъ касында Аскер Рамазановка эм Артур Рамазановка эстелик плиталары да ерлескен эдилер. Эстеликли шарада Огузер авыл администрациясынынъ ваькиллери, окытувшылар, СВО еринде янлары курман болган яслардынъ ата-аналары, авыл яшавшылары ортакшылык эттилер. Авыл администрациясынынъ аькимбасынынъ орынбасары Роза Байгишиева шарады аша келип, тынышлыктынъ келеектегисин канагатлав уьшин яс яшавларын берген аьскершилердинъ аьр кайсысынынъ да баасыз уьлисин белгилеп озды.
– Олардынъ атлары юреклеримизде оьмирлерге калаяклар, коьрсеткен баьтирликлери яс аркага йигитликтинъ эм коркынышсызлыктынъ уьлгиси болып калар, – деди ол. Авыл яшавшылары, Заур эм Аскер акында олардынъ яшав аьрекетлерин эм ямагатка пайда аькелмеге шалысувы акында белгилеп, оьз эскеруьвлери мен боьлистилер. Согыс оьзгериси юрген ерде ян берген йигитлердинъ ата-аналары, йыйылганларга оьз увыллары эм
олардынъ коьрсеткен баьтирликлери акында эслеринде саклап, юрек кайгырувын боьлискенлери уьшин, уьйкен разылыгын билдирдилер. Шарадынъ шатлыклы кесегиннен сонъ, онда йыйылганлар элимиздинъ коркынышсызлыгы уьшин яшавларын аямаган баьтирлердинъ эстелигине бир такыйка уьндемей турувлары ман эскердилер эм мемориаллык эстеликлерине гуьл байламларын салдылар.
Суьвретте: ян берген баьтирлерге эстелик.