27-нши ноябрьде ДР Аькимбасы Сергей Меликов республика яшавшылар ман тувра эфирге шыгаяк. Сонынъ акында билдирди ол янъыларда Telegramканалында.
– Сондай кепте биз 5-нши кере аьллесеекпиз. Сизди навасызландыратаган энъ маьнели темаларды ортага салып ойласармыз, бирге маьселелерди шешуьв йолларын белгилермиз. Соравлар берилип басланган. Олардынъ коьбисине явапламага шалысарман, ама, эгер тувра линия заманында сизинъ
соравынъыз эситилмей калгандай болса да, ога эс каратылар эм явап берилер. Сизинъ белсенлигинъиз аркасы ман коьплеген аян соравларды шешуьвге етисилген: дарманлар ман канагатлавдан эм газификациядан алып, уьйкен яшавшылар пунктларында эм савлай республика еринде уьйкен проектлерди яшавга шыгарувга дейим.
Мен дайым да тувра эм иштеликли аьллесуьвге аьзир, – деп язган ол. Гражданлар соравлары эфир заманына дейим бир неше куьнлер бойы туьрли йосыклар аркалы йиберилген: *VoprosGlaveRD.ru. официаллык интернет-порталдан; *8(8722) 98-90-81 «горячая линия» телефоны ман занъ согып;
*МАХ миллет мессенджерде VoprosGlaveRD-bot деген чатботтан. Тувра линияды республикадынъ туьрли телеканалларыннан эм радиостанцияларыннан, солай ок социаллык сетьлериннен карамага болады. *Телеканаллар: РГВК «Дагестан», ГТРК «Дагестан», «ННТ»,
«Среда-ТВ». *Радиостанциялар: «Страна гор», «Радио Россия-Махачкала», «Ватан», «Прибой», «Звезда», 7 небо – Дербент». *Онлайн: Сергей Меликовтынъ «ВКонтакте» эм «Дагестан» РГВК сайтында персональный бетте.
Сергей Меликовтынъ белгилеви мен, алдынгы тувра линияларда гражданлардынъ белсенли катнасувы аркасы ман сезимли сырагыларга етисилген. Ол яшавшыларга оьз соравларын, ой-токтасларын белсенлик пен йибермеге шакырув этти, бирге куьн аьлинде турган маьнели маьселелердинъ шешилуьв йолларын белгилер уьшин.
Соны ман, эндиги бир юмадан озгарылаяк тувра линия барысында республикамыз яшавшыларына оьз соравларын бермеге эм Дагестан етекшилиги мен куьн аьлинде турган маьселелерди ортага салып ойласпага маьнели эп болаяк. Айырым эс билимлендируьв, савлык саклав тармакларына, куьн аьлиндеги баска маьселелерге каратылса экен. Наркомания ман куьрес те белгиленсе экен, неге десе биз ясларымызды йоямыз…
Республика етекшисининъ «Тувра линиясы», социаллык соравларына эс этилинип, дагестанлылардынъ яшав сапатлыгын ийгилендируьвге каратылаягы аян.
Любовь Уразаева, «Шоьл тавысы» республикалык газетасынынъ яваплы секретари.