Согыс спецоперация барысында Россиядынъ шынты увыллары, алдынгы заманлардагындай болып, Элимиздинъ япсарларын, тувган ерин коршалайдылар, савдуныядагы тынышлык уьшин, келеектеги несиллердинъ наьсипли яшавы уьшин куьреседилер. Элине кыйынлык келгенде, онынъ туьрли муьйислериннен йигитлеримиз явды сокпага турдылар. Дагестаннынъ да йигерли йигитлери киели борышын толтырувды мойынларына алдылар. Олар согыс спецоперациясы озып турган ерде аьскер борышларын толтыраятып, коркынышсызлык, шыдамлык, куьшкуватлык коьрсетедилер. Не шаклы баьтирлер оьстирди Дагестан!
Согыс – ол тек баьтирликлер эм йигитликлер уьшин оьктемлик болып калмайды, ол эм йойымлар, токтавсыз ян авырув эм кыйынлыклар. Дагестаннынъ коьп йигерли йигитлери Эли, тувган ери уьшин янларын бергенлер. Бу, энъ де баалы – яшавларын аямаган, йигитлерди биз дайым
да эсимизде саклармыз. Олардынъ акында эсти яс несиллерге еткерермиз, Россия аьскершилерининъ кардаш-ювыкларына коьмек этпеге шалысармыз.
Ердеслери, таныслары эм аьскер йолдаслары согыс спецоперация барысында йигитше ян берген Дилимхан Кошеровтынъ ювыклары ман бирге кайгырадылар эм оны эсинде саклайдылар. Аьр кайсысы онынъ анасы Захират Мамашевадынъ юрек шаншувын енъил этпеге шалысадылар. Оьзек те, увылын йойыткан анадынъ ян сызлавын бир зат пан да енъил этип болмайсынъ, ама ога оьзининъ кайгысы ман ялгыз тувыл экенин сездирмеге керек.
Дилимхан Кошеров Терекли-Мектеб авылында тувып оьскен. А-Х.Джанибеков атындагы мектебинде окыган. Кишкей заманыннан алып спорт пан кызыксынган. Спорт пан каьр шегуьви оны тек куьш куватлы этип калмай, кыйынлыклардан оьтуьв бажарымлыгын эм яваплылык касиетлерин де беркиткен. Дилимхан мектебти окып болып, билим алды, иследи. Ол оьзининъ анасына эм инилери Рашид пен Артурга дайым тирев болган, а йолдаслары арасында сый-абырайы уьйкен эди. Дилимхан Кошеров, РФ Коршалав министерствосы ман контракт туьзип, уьстимиздеги 2025-нши йылдынъ январь айында согыс спецоперация озып турган ерге йолланды. Ол 90600 аьскер боьлигининъ мотострелковый батальонынынъ мотострелковый боьлигининъ мергини болган. ЛНР эм ДНР ерлеринде согыс спецоперация борышларын толтырган эм 2025-нши йылдынъ апрель айынынъ 7-нши куьнинде йигитлерше ян берген. Сол бизге ердесимиз акында белгили болган билдируьв. Бек оькинишли, ол бизге дав майданда коьрсеткен йигитликлери акында эндиги бир де айтпаяк. Онынъ танысларынынъ соьзлерине коьре, ол бек йигерли, бурынгы замандагы ата-бабаларымыздай коркынышсыз, йолдасларын куткарар уьшин оьзин аямаяк эр киси эди.
Анасынынъ соьзлери мен, Дилимхан оны ман 4-нши апрельде занъ согып соьйледи. Мен кыска болжаллы тыншаювга кайтканда, йорык сен ислеген калага келип, сени коьрермен деп соьз береди. Сонъ ол кезекли аьскер борышын толтырувга шыгады, сол болса онынъ уьшин энъ
ызгысы болган. Дилимхан авыр борышка бараяктан алдын анасы ман соьйлейди, тек оны кыйландырмас уьшин кайда танълагысы куьн кетеегин билдирмейди. Сонъ коьп куьнлер эм айлар оннан хабар келмейди, ювыклары онынъ акында бир зат та билмейдилер. Авыр белгисизлик бир
неше айга созылады. Ердесимиз йигитлерше ян берди деген кайгылы хабар ювыкларына 13-нши октябрьде келеди.
– Меним балам Дилимхан ян берген деп эситкенде, аягымнынъ астындагы ер кеткендей болды. Ол кайдай куьшкуватлы, явга берилмеек йигит эди, мен онынъ аман-эсен кайтаягына кайтип сенетаган эдим. Кайгым эм ян авырувым ман ялгыз калдырмаганлардынъ аьр бирисине уьйкен савбол айтаман, увылымнынъ дослары кайдай коьтергишлев де этедилер.
Балалай кедем мен дослык туткан Салавдин Башантавов мага мундай йылы соьзлер язды: «Дилимхан сизге коьмек этпеге, сизди коьтергишлемеге калай суьйген эди. Мага аьли калай авыр, а сизинъ юрегинъизде не болаятканын мен ойлап та болмайман. Шыдамлык сизге», – деп боьлиседи Захират Камальдиевна.
Дилимхан акында аьли де хабар келмеген, анасы тынышлык таппаган заманларда увылы онынъ туьсине узын ясыл кийим кийип энеди. Неге уьстинде ясыл узын кийим экен деп ойланады анасы. Кайгылы хабар келгенде, Захиратка увылы ян берген сонъ, оны мусылманлы аьдем аьруьвлеп йибергенин эм уьстине ясыл кумаш ябылган болганын, колы, аягы, баьри ери де сап-сав, тек куьлле коькирегине тийген экенин айтадылар.
– Дилимханнынъ 8 ясындагы кызы калды. Ол оьзининъ атасы ман оьктемсийди. Эгер Милана бир ерде СВО катнасувшылардынъ, бизим заманнынъ баьтирлерининъ суьвретлерин коьрип калса, меним атам да согыс спецоперацияда, онынъ суьврети неге йок деп, излейди. Ол аьли де
атасы ман байланыслы авыр хабарды билмейди, – деп боьлиседи Дилимханнынъ анасы.
Бу хатыннынъ кайгыга эм ян авырувга толы коьзлерине карав тыныш тувыл эди. Ол арада куьлемсиреп, увылы акында эскеруьвлери мен боьлисти. Аталыкты коршалавшыларды тербиялаган аналар алдында тизге шоьгемиз. Сиз энъ де аявлы – увылларынъызды элинъизге бердинъиз.
Увылынъыз Дилимхан Тимурхан увылы Эли алдында борышын намыслы толтырган эм ызгы куьнине дейим берген антына алал болган. Ол дайымларга патриотлык эм намыс белгиси болар, халкымыздынъ эсинде эм тарихинде онынъ аты сакланар.
Нурият Кожаева.
РФ Журналистлер союзынынъ агзасы.
Суьвретте: Дилимхан Кошеров.
