Ийги йоллар яшавдынъ тамыры болады. Йолды ярастырув кайсы орамнынъ да коьркин аькелип, онынъ яшавшыларынынъ куьндегилик яшавын енъиллетип, онъайлы этеди. Ногай районынынъ Терекли-Мектеб авылынынъ И.Нукаев атындагы орамында янъыларда коьптен саклаган шатлыклы оьзгерис болды. Куьзде, язда куьшли ямгырлардан сонъ, язлыкта кар иригенде уьйкен коьлге, шандакка айланатаган, аьр бир
ерде шукырлар толып, коьлик азар юретаган, тозган йоллары янъыдан ярастырылып, аьр бир азбарга сув бургылары тартылып, орам яшавшылардынъ яшав сапатлыгы ийгиленди. Орам яшавшылары сол ярастырылган йолда энди оьз коьликлерин де айдамага яде яяв юрмеге коркпаяклар. Аьр бир орам яшавшысы туьзетилген йол ман барганда, азбарында аккан даьмли сувдан татканда, сол ярастырув ислерде
белсенли катнасканларды ийги соьзлер мен эслерине туьсирип, йылы эскерип тураяклар.
Терекли-Мектеб авылынынъ И.Нукаев атындагы орамынынъ яшавшылары авыл администрациядынъ аькимбасы Марат Избуллаевич Кулунчаков пан кезекли йолыгыс озгарып, осал аьлде болган йол, сув маьселелери бойынша алдыда этилинеек куллыклары акында бир ой-токтаска келдилер. Сол орамда ис кайнап баслады. Коьп заман кетпей, орам яшавшылардынъ эм авыл администрациядынъ биргелес сув линиясын тартув бойынша биргелес проектининъ тамамлары келтирилдилер. Солай болып, авыл администрациясы ман «Дорожный фонд 2025» программасын яшавга шыгарув бойынша И.Нукаев атындагы орамынынъ йолы да капиталлык аьлде ярастырылды. Сол проект авыл администрация аькимбасынынъ
баславы ман яшавга шыгарылды. Орам яшавшыларына да проекттинъ яшавга шыгарылувында коьплеген исти юритпеге туьсти. Соьйтип, авыл администрациясы ман сув тартув, йолды ярастырув бойынша оьз мойнына алган борыш толы оьлшемде толтырылды.
«Сол И.Нукаев атындагы орамынынъ онъайлы исте оьз ярдамын эткен аьр бир яшавшысына да эм авылдынъ эм сол ок орамнынъ яшавшысы Эмир Амирхан увылы Сеитовка авылдынъ ямагат яшавында белсенлик пен катнасканы уьшин айырым разылыгымды билдиремен.
Баска болып, Терекли-Мектеб авылымыздынъ баьри яшавшыларын да белсенли яшав йолын туьзуьв эм халкымыздынъ онъайлыгын ийгилендируьв ниетте социаллык ягыннан маьнели проектлеринде биргелес катнаспага шакыраман», – дейди авыл аькимбасы Марат
Избуллаевич. Оьз ягыннан юреклери уьйкен суьйинишке толган орам яшавшылары да сол онъайлы исин баслап, ога оьз уьлисин коскан авыл администрация аькимбасы Марат Избуллаевич Кулунчаковка, орам яшавшысы, белсенли аьрекетшиси Эмир Сеитовка орам маьселелерине
яны авырып, берген соьзлерин ыслап, яшавшылар акында каьр шеккенлери, этилген истинъ ийги тамамлары уьшин шынты юрек разылыкларын билдиредилер. Оларга эм олардынъ аьеллерине берк ден савлык, узак оьмир, тынышлык, наьсип эм яшав онъайлыгын йорайдылар. Терекли-Мектеб авылдынъ И.Нукаев атындагы орам яшавшылары.
Суьвретте: ярастырув ислери юруьв мезгили.
