Олар оьлимсизликке абытлайдылар, бизим йигитлер. Кайдан билейик биз, тынышлыкта оьскен инсанлар, фашизм басын коьтерип, бизим увылларымыз, аданасларымыз явды урмага атланаягын?
Буьгуьнлерде СВО еринде Аталыкты коршалап турган ясларымыздынъ кайбириси – бизге баьтир. Олар кыйынлы аьллерде енъуьвди ювыклатадылар, биз олар ман оьктемсиймиз, олар уьшин тилек тилеймиз, бизим тынышлыгымыз уьшин яс янларын бергенде, ювыклары ман бирге йылаймыз.
Арслан Сейпулла увылы Етмишев Ногай районынынъ Кумлы авылында бала заманнан алып оьскен.
Ата-анасы Сейпулла Аджигелди увылы эм Тайрат Адиль кызы Ленинаулда яшаганлар, Арслан болса, энеси мен (Шавдировлардынъ аьелинде) яшаган. Атасы (яткан ери ярык болсын) тракторист болып ислеген, анасы мектебте эсап дерисин окытады. Мектебти битирип, Арслан эр борышын толтырмага кеткен, Калининград областининъ Храброво деген поселогында Балтийский флотында куллык эткен. Аьскерлер сырасыннан кайтканнан сонъ, Норильск каласында ислеген.
Арслан Етмишев – согыс аьрекетининъ ветераны, Шешен Республикасында конституционлык йорыгын туьзуьвде белсен катнаскан. 2021- нши йыл Арсланбековский сельсоветининъ депутаты болган, сонъында Ногай районынынъ Депутатлар йыйынына да сайланган. Авылда курувшы болып куллык этетаган эди.
Яшавдынъ танълагысын бирев де билип болмайды. Тек туьнегуьнлерде Арслан тынышлы яшав ман яшап турган, хатыны Марьямгуль Толеген кызы ман кишкей аьвлетлерин – Дженнетти, Рустамды эм Гюзельди тербиялап туры эди. Быйыл навруз айында ол согыс спецоперациясы барысында ЛНР эм ДНР еринде согыс борышларын толтырып турганда ян берген.
СВО ерине ол увыт айында кеткен эди, Коршалав министерствосы ман контрактка кол баскан, мотострелковый взводтынъ старшина-водители болып ислеген.
Ювык аьдемди йойытпага кайдай кыйынлы. Тек туьнегуьнлерде сенимли дуныя «ян берди», «энди йок» деген соьзлерден бузылады. Биз кайгырамыз, а кайдай сезимлер буьгуьнлерде анадынъ, хатыннынъ юреклеринде толкынласадылар. Олардынъ кайбириси бизге ювык болып каладылар. Сол бизим ортак авырувымыз, ортак кайгымыз. Оьзининъ кызларына Арслан Етмишев дайымларга олардынъ тынышлыгы уьшин янын берген суьйикли эм бавырмалы ата, увылы Рустамга – ата-баьтир
болып калаяк. Аьвлетлер оьсер, ама олар янларында, оькинишке, атасын йойыткан кишкей саьбийлер болып тураяклар. Аталарынынъ баьтирлигине дайым да тийисли болып оьссинлер Арслан Етмишевтинъ балалары.
Сол затка биз шекленмеймиз. Кетер заманлар, енъуьв мен кайтаар шоьлимизге ясларымыз. Сол каты согысувларда яшавларын курманлык эткен ясларымыздынъ атлары алтын арыплар ман язылар Уллы Россиядынъ баьтирлик йылязбасында.
Биз кайгырамыз Етмишевлердинъ аьели мен. Биз аьр дайым сизинъ касынъызда, биз кайгырамыз эм Арслан ман оьктемсиймиз. Онынъ акында эстелик аьр заман бизим юреклеримизде.
Гульфира Бекмуратова.
Суьвретте: А.Етмишев.
