Йыл сайын 12-нши декабрьде Россия Федерациясынынъ Конституциясынынъ куьни белгиленеди, ол элимиздинъ маьнели ямагат-политикалык шарасы болып саналады. Сол куьн 1993-нши йылда савлайхалклык тавыслав йорыгы ман Россия Федерациясынынъ Конституциясы кабыл этилинип алынган. Россия Президентининъ Указына коьре 1994-нши йылдан алып 12-нши декабрь куьни патшалык байрамы деп билдирилген.
Конституция – элимиздинъ асыл законы – Россиядынъ савлай ыхтыярлар тармагынынъ туьп тамыры болып саналады эм баска баьри законлардынъ бас негизи болады.
Россия Конституциясы – ол патшалыгымыздынъ демократиялык йолы ман оьрленуьвининъ берк табаны. Кайсы бир элдинъ де гражданини уьшин Конституция закон деп саналады, эм ол ал деп соны аьруьв билмеге тийисли, неге десе законларды билимли кепте кулланып болув – дурыс туьз яшавдынъ
нормасы, сонынъ сапатын арттырув уьшин энъ куватлы алаты болып эсапланады. Россия Конституциясы кабыл этилинип алынганлы бери сонынъ иштелигине бир неше туьзетуьвлер киргистилгенлер. Солардынъ энъ де ызгысы «Россия Федерациясынынъ Президенти гражданлар ман ортак эм тенъ тувра сайлав ыхтыяры ман ясыртын тавыслав негизинде алты йыл ис болжалына сайланады» (сога дейим РФ Президенти 4 йылга сайланатаган болган). Сол ок заман
Россия Конституциясына РФ Государстволык Думасы бес йыл ис болжалына (сога дейим 4 йыл болган) сайланады деген туьрлентуьв де киргистилген.
2014-нши йылда РФ Оьр суды ман РФ Йогары арбитраж суды бирге косылувы ман эм Россия эсабына Крым Республикасынынъ эм федераллык маьнелиги болган Севастополь каладынъ киргистилуьви мен байланыста Россия Конституциясына янъы туьрленислер этилинген. 2020-ншы йылда элимиздинъ Асыл Законына президентке, оькимет агзаларына эм туьрли оьлшемдеги патшалык чиновниклерине, гражданлар алдында патшалыктынъ социаллык гарантияларын беркитуьвге, парламенттинъ полномочиелерин туьрлендируьвге, федераллык ерлерди патшалыктан айырып алувга тыйдажлык салувга, орыс тилининъ статусын беркитуьвге каратылган янъы талаплавлар да киргистилдилер. 1994-нши йылдан алып тап он йыл узагына дейим РФ Конституция куьни тыншаюв куьни болып келген. 2004-нши йылда Государстволык Думасы РФ Ис кодексине туьзетуьвлерди кабыл эткен сонъ, Россия байрам календари де туьрлентилген. Сол Законга коьре Конституция куьниндеги тыншаюв куьни тайдырылган, а байрам оьзи 2005-нши йылдынъ июль айыннан алып Россиядынъ
эстеликли куьнлерининъ эсабына киргистилген.
