Ясларымыздынъ аты ийгилик пен айтылса, суьйинемиз.
Бу йылдынъ язлыгында, баслап, Красноярск каласында эркин куьрес бойынша оьспирлер ара Россия Бириншилиги ердесимиз Казманбет Замир увылы Батыровка уьстинлик аькелди. Сол шарада ол Дагестан Республикасынынъ атын яклап, элли эки киллограм шеккиси бойынша куьшти эм усталыкты
коьрсеткен.
Россия Бириншилигинде катнаскан Дагестан Республикасынынъ оьспир куьби бу куьн, Алания, Шешен Республикаларыннан барган куьплерди калдырып, биринши орынга тийисли болган эди. Сол енъуьв бизим ердесимиз Казманбетке Италия элининъ Каорле каласында оьтеек Европа Бириншилигине йол
да ашты. Мунда да яс чемпион савгалы орынга тийисли болды.
Шет элде оьткен сынаста Казманбет Батыров ез медалине тийисли болды. Сол тувыл ма етимис деген. Кишкей Ногай районында тувып-оьскен, ерли спорт мектебинде куьн сайын оьзининъ куьш-куватын оьрлендируьв уьстинде ислеп турган яска бу уьйкен савга эм уьстинлик эди.
Сол зат бизим яслардынъ, олардынъ тренерлерининъ йогары спорт аьзирлигин коьрсетеди. Онынъ базласлардан сонъ тувган-оьскен авылы Нариманга кайтувы уьйкен байрамга айланады. Казманбет Батыровтынъ Россия Бириншилигинде етискен уьстинлиги яс аьдемлерге спорт уллы мырсатлар беретаганын коьрсетеди.
Бу йыл Казманбеттинъ кыйыны акланды, эм биз, йыл тамамларын келтирип, оны «йыл спортсмени» деген атка тийисли деп ойлаймыз.
Аьли Казманбет Батыров Россия Федерациясынынъ Эркин куьрес бойынша йыйылма куьбининъ сыраларына кирген. Биз алдыда ога тек ийгиликлер, енъуьвлер йораймыз.
Галима Сагиндикова.
Суьвретте: К.Батыров.