Ногай районында, «Балалар террорга карсы» деп аталып, балалар суьвретлерининъ ярысынынъ муниципаллык кезеги тамамланды. Онда район мектеблерининъ окувшылары ортакшыладылар. Шара уйгынлавшылары конкурс катнасувшыларынынъ ясларына коьре эки куьпке боьлдилер: биринши – 5-нши – 7-нши класс окувшылары уьшин эм экинши — 8-нши – 9-ншы класслар окувшылары уьшин.
Окувшылар ийги сырагылар коьрсеттилер. Биринши куьп окувшылары арасыннан З.Акмурзаев атындагы Червленные Буруны авылынынъ орта мектебининъ 5-нши «б» класс окувшысы Аделия Аджиниязова (етекшиси Зухра Шомарова) – 2-нши орынга, А.Асанов атындагы Нариман авыл мектебининъ 7-нши
«б» класс окувшысы Камилла Садыкова (етекшиси Айна Садыкова) 3-нши орынга тийисли болдылар. 8-нши – 9-ншы класслар окувшылары арасыннан М.Курманилиев атындагы Куьнбатар авыл орта мектебининъ 9-ншы класс окувшысы Насипхан Кокурова (етекшиси Кабират Янполова) – 1-нши орынды, К.Кидирниязов атындагы Карагас авыл мектебининъ 9-ншы класс окувшысы Амина Оразова (етекшиси Разиет Оразова) 2-нши орынды бийледилер. 3-нши орынды З.Акмурзаев атындагы Червленные Буруны авыл мектебининъ 8-нши класс окувшысы Алина Сабутова (етекшиси Зухра Шомарова) эм А.Ш.Джанибеков атындагы Терекли-Мектеб орта мектебининъ 8-нши класс окувшысы Азиза Ажмурзаева боьлистилер. Енъуьвшилерди кутлав
ман байланыслы шатлыклы шара С.Батыров атындагы саниятлар мектеби меканында болып озды. Атлары белгиленген конкурс катнасувшыларына Ногай район етекшисининъ орынбасары Мурат Шадиев эм юридический боьлигининъ начальниги Эльмира Нукаева грамоталар тапшырды. Яс суьвретшилердинъ етекшилерине оьсип келеяткан несилди тербиялав исине коскан уьлиси уьшин разылыклар тапшырдылар. Шарада Терекли-Мектеб авыл С.Батыров атындагы ДШИ директоры Анвар Аджибаев, район билимлендируьв боьлигининъ начальниги Амирхан Межитов, методисти Байрамали Бекмурзаев эм билим тармагынынъ баска ваькиллери ортакшылык эттилер.
«Балалар террорга карсы» конкурсы балалардынъ яратувшылык талаплыгын оьрлентуьвге, оларда патриотлык сезимлерди эм тынышлыкка ымтылыслыкты кеплевге себеплигин тийгистеди.