Дагестан Республикасынынъ Халк Йыйынынынъ Председатели Заур Аскендеров эм Запорожская областининъ Законодательный Йыйынынынъ председатели
Виктор Емельяненко видеобайланыс бойынша ис йолыгысын озгардылар. Бу шара регионлар ара катнасувдынъ аьлиги заманга келисли соравларын ойласувга эм
туьрли тармакларда бирге аьрекет этуьвин беркитуьвге каратылган.
Дагестан яктан шарада вице-спикер Камил Давдиев, Халк Йыйынынынъ комитетлерининъ етекшилери Фирудин Раджабов, Асият Алиева, Абдулла Магомедов, солай ок председательлердинъ орынбасарлары Валерий Громов, Джамалудин Нажмудинов ортакшылык эттилер. Запорожская областиннен Виктор Емельяненко, онынъ орынбасары Михаил Попов эм коршалав, правосаклав органлары ман бирге ислев, аьдеттен тыс аьллери бойынша комитетининъ председателининъ орынбасары Сергей Юрченко катнастылар.
Заур Аскендеров Дагестан эм Запорожская область узак болса да бир-бириннен, олардынъ арасында байланысларды беркитуьвдинъ маьнелигин белгиледи.
Онынъ айтувы ман, бу байланыс алдыда кол басылган катнасув акында макулласувды толтырувга берк абыт эм ийги сырагыларга етисуьв болады. Ол бизим йолдасларымыз кайдай кыйынлы аьлде Запорожьеде ислейтаганын аянлап, Дагестан баьри яктан да коьтергишлев этеегин катырып айтты. Халк Йыйынынынъ
председатели кайдай уьйкен маьне Дагестан Аькимбасы
Сергей Меликов Запорожская областининъ яшавшыларына этилинетаган коьмекке эм дослык байланысларына беретаганын белгиледи. Коьплеген ислер этилинген: мектеблер, балалар бавлар, больницалар салынган, турак уьйлерде, маданият объектлерде капиталлык ярастырув ислери озгарылган, социаллык яктан
маьнели проектлер де яшавга шыгарылган. Айырым маьне Запорожьединъ балаларына, олардынъ Дагестан еринде тыншаювына бериледи. Запорожская областинде дагестан врачлары, окытувшылары ислейдилер. Келеекте де республика гуманитарлык коьмегин этеек, бу ис аьлиги заманда приоритетли ислерининъ бириси деп саналады.
Бу ерде СВО катнасувшыларына эм олардынъ аьеллерине коьмек этуьв соравы да коьтерилди. Законодательли дережеде коьтергишлев маьнели орында болса, Запорожье областининъ савлайроссиялык ыхтыярлык эм социалэкономикалык аьрекетине киргизуьви тыныш болар.
Оьз соьйлевинде Виктор Емельяненко эки субъектлерининъ законодательлик властьлерининъ ортак борышлары эм ис барыслары коьп экенин белгиледи. Айырым ол Дагестан аьскершилерининъ СВО еринде коьрсетип турган йигерлигин, баьтирлигин белгиледи, Заур Аскендеровка, баьри депутатларга, Дагестан яшавшыларына этилинип турган коьмеги уьшин савбол айтты.
Бизим хабаршы.