Янъы йылдан алдын Дагестан Республикасынынъ Ногай районыннан, тагы да бирликти, яны авырувлыгын коьрсетип, согыс спецоперация юрген ерде йигитлерше согыскан аьскершилеримизге кезекли гуманитарлык юги йиберилди. Бу йолгы посылкалар Янъы йылга алдышылыкта йигитлерше куьресетаган ердеслеримизге кетти. Гуманитарлык юги коьплеген район яшавшыларынынъ ярдамы ман йыйылды. Ногай район администрациясы кесек заман ишинде 100 мынъ маьнет акша эсабында маьнели косымын этти эм келеекте де волонтерларга ярдамласпага аьзирлигин билдирди. Солай болып, ТереклиМектеб авыл администрациясы да йолга шыккан ясларга 5 мынъ маьнет акша эсабында ярдамын этти.
Акшалай эм аьскершилерге керекли амалларын йыювда Терекли-Мектеб, Кумлы, Карасу, БатырМурза, Червленные Буруны, Бораншы, Куьнбатар, Нариман, Орта-Тоьбе авыллары белсенли катнастылар.
«Шоьл тавысы» газетасынынъ редакция куллыкшылары, А-Х.Джанибеков атындагы орта мектебининъ, Орта-Тоьбе, Нариман авыл мектеблери эм балалар
бавы да шетте калмадылар, олар аьскершилерге консервалар, азык-туьлик эм коьплеген баска керекли затларын йибердилер. Аьскершилерге боьтен де балалардынъ
коллары ман язылган йылы йоравлары ман хатлары бек сезимли эм баалы савга эди. «Неравнодушные сердца» волонтерлар куьбининъ уйгынлавшыларынынъ соьзине коьре, А-Х.Джанибеков, Кадрия атындагы мектеблерининъ, «Ногай Эл» балалар бавынынъ, баска болып, авыл администрация, социаллык тармагынынъ эм сондай баскалар аьскершилеримизди явдынъ куьллесиннен коршалав ниетте шилтерлерин согувда белсенли катнасып келедилер. Айырым разылыкка, айтпага, волонтерлар Крымхан эм Айбике Ялманбетовлар, Нурбике Османова, СВО еринде ортакшылык этетатаган эки катнасувшылардынъ анасы Сапуэт Манапова, Зарема Толубаева тийисли боладылар. Бу йигит волонтерларымыз уйкысыз йиберген эки кешелери бойында баьри керекли затларды сатып алдылар, аьзирледилер, оларды айырып эм кеплеп те уьлгирдилер.
Янъы йыл посылкаларына, айтпага, он коькис эт, йылы ювырканлар, кийимлер, эмленуьв алатлары, емислер, сувлар, таьтли зияпетлери эм аьскершилердинъ
кавыфсызлыгын канагатлав уьшин 17 шилтерлери кирдилер. «За содействие СВО» медалининъ иеси Альмира Акмурзаева бу йол да шетте карап калмады. Ол согыс
спецоперация юрген ерде катнасатаган ясларга азыктуьлик йиберуьвде коьп кере ортакшылык этип келеди.
Бу йол да ол аьскершилерди оьзининъ даьмли таьтли аслары ман суьйиндирди. Сол онъайлы исине Бораншы авылы да оьз косымын этти. Авыл яшавшылары иссилей асларын, айтпага, коькистен боьреклерин аьзирлеп, писирилген эт, емислер эм консерваларды йибердилер.
– Биз районымыздынъ баьри яны авырыйтаган яшавшыларына, администрациямызга гуманитарлык югин йыювда ортакшылык эткени, коскан уьлиси уьшин уьйкен разылыгымызды билдиремиз. Алдышылыкта болган аьскершилеримиз асларымыздан татып, уьйдинъ йылувлыгын сезсинлер. Ясларымызга оьз
тувган ерлерине, аьеллерине, кардаш-тувганларына аман-эсен, коьптен сакланган енъуьв мен кайтканларын йораймыз. Ярдамга аьр бир кол созганларга, бу авыр
заманда аьскершилеримизди коьтергишлеп, янынъыз авырыганы, эткен коьмегинъиз уьшин коьп савболынъыз, – дейди «Неравнодушные сердца» волонтерлык куьбининъ белсенли катнасувшысы Нурбике Османова.
Янъы йылга гуманитарлык югин ердеслеримизге еткеруьвде Нариман авыл межигитининъ имамы Адил Эсенгельдиев, «Газель» коьлигининъ айдавшысы Артур
Сангишиев те айырым уьлисин костылар. Олар тек коьликти уйгынлап калмай, гуманитарлык югин Запорожское направлениеге аман-эсен еткердилер.
Соьйтип, волонтерлардынъ, Ногай районынынъ яны авырыйтаган яшавшыларынынъ иси эм каьр шегуьви аркалы СВО катнасувшыларынынъ фронттагы
куьндегилиги кишкей болса да енъиллетилди эм аьскершилердинъ Янъы йылда коьнъилин коьтермеге амал болды.
Г.Нурдинова.
Суьвретте: гуманитарлык юги йиберилуьв аьсери.