Терекли-Мектеб авылдынъ А-Х. Джанибеков атындагы орта мектебинде «Дослык коьпири» деп аталган йылы катнасувлык шарасы болып оьтти.
Сол куьн байрамша кийинген мектеб окувшылары ман окытувшылары узактагы Карашай-Шеркеш Республикасынынъ Ногай районынынъ Икон-Халк, Эркин-Халк эм
Эркин-Шахар авылларыннан келген сыйлы конакларды: окувшыларды, окытувшыларды, олардынъ ата-аналарын хош коьрип йолыктылар. Эл аьдетине коьре, конаклар да бос кол ман келмедилер, мектебке эм балаларга савгалар, алмалар алып кирдилер. Конакбайлык аьдетин тутып, мектебтинъ окытувшылары конакларды исси ногай шайы ман сыйладылар.
Муннан сонъ байрам кебинде ыспайланган мектеб фойесинде келген конакларга каратылган саламлав соьзи мен мектеб директоры Курасхан Ярикбаева шыгып соьйледи. Ол дуныяда эки ягаларды бирге косатаган эм сол ок заманда аьдемлерди, мектеблерди, ийги баславларды бирге байланыстыратаган коьпирлер бар деп белгиледи. «Буьгуьн биз эки мектеблеримиз, эки миллет районларымыз арасында ийги дослык аьдетин яшавга киргистип турмыз.
Сонынъ уьшин де биз буьгуьн коьп аьруьв сезимлерге толармыз, янъы ой-ниетлер мен, оьзлеримиздинъ ис сулыпларымыз бан боьлисермиз, бизим мектеблеримиз буьгуьн не мен яшайтаганын коьрсетермиз деп ойлайман. Элбетте, дослык коьпири – ол бизим янъы аьдетимиздинъ, янъы катнасувымыздынъ басы. Буьгуьн бизим аявлы досларымыз бан ашылып турган йолыгысымыздынъ йоллары, бизим юреклеримиз бен курылган дослык коьпири коьп йылларга берк боларлар деп сенемен», –
деп йорады окув ошагынынъ етекшиси.
Конакларга хош келди соьзин солай ок Ногай районынынъ билимлендируьв боьлигининъ басшысы Амирхан Межитов та айтты. Ол эректеги Карашай-Шеркеш Республикасыннан бизим канымыз-янымыз бир оьрметли кардашларымыздынъ шоьлимизге келгенин биз кардаштувганлыктынъ эм дослыктынъ байрамы деп санаймыз деди. «Аьли бизим янымызда олтырган сыйлы ясуьйкенимиз Сталинбек Муллаев аьвелде совет йылларында бизи мен кобан ногайларынынъ арасында берк
катнасувлар болганын билдирди.
Ызгы йылларда солар бираз осалланган эдилер, эм сонынъ уьшин де биз сизинъ келуьвинъизди хош коьремиз эм ол зат арамыздагы катнасувларымызга янъы сезимлер эм янъы куьш косар деп сенемен», – деди Амирхан Межитов.
«Конак атанънан уьйкен» деген асыл аьдетти сыйлап, соьзди кобан ногайларынынъ ваькили, шахмат ойыны бойынша КЧР бас тренери Джанибек Карасовка бердилер.
Онынъ шыгып соьйлеви, бир хыйлы заманга созылганына карамастан, басыннан ызына дейим Дагестаннынъ Ногай районынынъ яшавшыларына сондай да уьйкен разылык эм терен сый сезимлерине толганлыктан, бир неше кере карс кагувларга тийисли болды. Болса да онынъ соьзи биревди де бездирмеди, кене
де йолыгыска айырым ярык коьнъил йылувлыгын косты. «Биз КЧР ногайларыннан Караногайдагы бизим шоьл ювыкларымызга уьйкен салам алып келдик, соьйтип биз дайым да таза юрек муьсиревлигимиз бен бу аьлемет конакбай ерге суьйип айтамыз», – деди Джанибек Карасов.
Ол коьп йыллардан бери ТереклиМектебте, Бораншыда, Карагаста, Червленные Буруныда коьплеген ногайлар ара болатаган шараларда, сонынъ ишинде шахмат турнирлеринде катнасканын билдирди. Джанибек белгили ногай аьлими, филология илмилерининъ докторы Насипхан Карасовадынъ, аьлиги заманда – Суюновадынъ, тувган аданасы экенин айырым белгиледи. Солай ок олардынъ авылында халкымыздынъ данъклы аьдемлери: тарих илмилерининъ докторы Рамазан Керейтов, айтувлы ногай йырлавшы эм композитор Асау (Арсланбек) Султанбеков, Россиядынъ йыл окытувшысы Зайрат Байбаисова, куьрес бойынша
КЧР тренери Эльдар Каракаев тувып оьскенлери акында хабарлады. Ол оьзининъ шахмат клубы, яс шахматшылардынъ туьрли савлайроссиялык эм халклар ара турнирлерде казанган уьстинликлери акында да ийги соьзлерин айтты.
Шарада А-Х.Джанибеков атындагы орта мектебининъ окувшылары ана тилинде ятлавлар окыдылар, йырлар йырладылар, биювлер бийидилер, миллет ойынларды эм ногай язувшы Магомет Керимовтынъ «Кыйшык йол» деп аталган интермедиясын коьрсеттилер. КЧР Ногай районынынъ Эркин-Халк эм ИконХалк авылларынынъ мектеблерининъ окувшылары ортага шыгып тувган тилинде ятлавлар окыдылар эм Карашай-Шеркеш Республикасынынъ патшалык байрагы ман бирге ногайлардынъ бурынгы тотеми «Коьк боьри» ясалган байракты яйып коьрсеттилер. Муннан сонъ шара эки Ногай районларынынъ ваькиллерининъ бир-бириси мен танысувы эм хабарласувы ман каранъа кеште тамамланды.
М-А.Ханов.
Суьвретте: А-Х.Джанибеков атындагы мектебте йолыгыс аьсери.