Ногай район китапханасында мундагы «Адабият конак боьлмесининъ» кезекли шарасында белгили эм талаплы шаир Мархаба (Бекмурзаева) Айтугановады хош коьрип йолыктылар. Мархаба Абу кызы ногай окувшыларга коьп йыллардан бери таныс. Онынъ ятлавлары «Шоьл тавысы» эм «Ногай давысы» республикалык газеталарынынъ, «Тувган ерим» адабият альманахынынъ, «Лашын» балалар журналынынъ бетлеринде баспаланып шыкканлар. Шарады юритуьвши Арувбийке Якубова бу куьнги йолыгыс аьдеттен баскаланады деп белгиледи. Ол йыйылганларга айтылган йырлавшы, ДР ат казанган артисти Алибий Романовтынъ йырлавында «Келши мага язлык яйнап туьскенде» деген йырды тынълаттырды эм сонынъ соьзлерининъ авторы Мархаба Айтуганова болады деп билдирди. А.Якубова онынъ
яратувшылыгын окувшылар йылы йолыгатаганын белгиледи.
Шаирдинъ синълиси Айсылув Тангаева аьптесининъ оьнерине багыслап район китапхана куллыкшылары озгарып турган амаллама уьшин разылыгын
билдирди. «Меним аьптем Мархаба аьли де мектебте окыйтаган заманда язатаган болган, сонъ студент йылларында да. Тек сол йылларда аьптемизди коьтергишлемеге амал болмаган. Болса да, сога карамастан, Мархаба калемин шет тасламаган, язувын коймаган. Сонынъ уьшин ога уьйкен разылык», – деди А.Тангаева.
Ол Мархаба Айтугановадынъ ятлавын окыды эм онынъ акында аьзирленген видеоролигин коьрсетти.
Оьзининъ соьзинде шаир, язувшы Магомет-Али Ханов Мархаба Айтугановады коьп йыллардан бери таныйтаганы, онынъ лирика сезимлери, ятлавларында тувган ерин, яшавды оьзинше суьвретлеви акында айтты. «Мархабадынъ шыгармаларында согыс тематикасы да айырым орын табады эм ол зат онынъ суьйикли атасы, Уллы
Аталык согысынынъ ветераны Абу Бекмурзаев пен (Алла ога тынышлык берсин) байланысканы тувра коьринеди. Абу-агай оьзи де тири заманында райондагы коьп шараларда белсен катнасатаган эди», – деп белгиледи М-А.Ханов. Ол шаирге яратувшылыгында янъы уьстинликлерди йорады эм оьз ятлавларын айырым китап этип шыгармага маслагат этти.
Шарада шаирдинъ А-Х.Джанибеков атындагы мектебте бирге окыган кыймасы, Куьнбатар авыл яшавшысы Райхан Аджикова да катнасып, онынъ акында йылы соьзлери мен боьлисти. Онынъ айтувы ман, Мархаба мектеб йылларында бек тербиялы, нызамлы, окувга мукаят, меншиликти суьймейтаган кызалак болып оьскен.
Ол шаирдинъ яратувшылыгынынъ тематикасынынъ кенълиги, ятлавлары енъил окылып, юрекке де, коьнъилге де етип болатаганы акында хабарлады.
Оьз ягыннан кыймасына ийги йоравларын айтып, ога айырым китап шыгармага коьмек этуьв керегин белгиледи.
Шарада район китапханасынынъ алдынгы куллыкшысы, ДР ат казанган маданият куллыкшысы Сапихан Курпаева, шаирдинъ ювык авылдасы Болдыбийке Койлубаева, синълиси, авылдасы Гульнара Беккишиева, ДР ат казанган артисткасы Аминат Кудайбердиева (ол шаирдинъ соьзлерине язылган йырды йырлады), Нина Халилова, аданасы Солтан Бекмурзаев катнастылар эм ийги йоравларын айттылар.
«Адабият конак боьлмесин» яба келип, китапхана директоры Сабират Абубекерова Мархаба Айтугановага мунда болып озатаган коьп шараларда белсен катнасувын белгилеп, ога тувган ногай тилине, халкына алаллыгы, юреклерге етип болатаган соьз оьнери уьшин разылыгын билдирди эм савга тапшырды. Оьз кезуьви мен Мархаба Айтувганова шарады уйгынлаганы эм сонда катнасканы уьшин баьрине де разылыгын билдирди эм янъы ятлавларын окыды.
М.Юнусов.
Суьвретте: шарадан коьринис.
