Янъыларда Дагестан етекшиси Сергей Меликов ДР Халк Йыйынынынъ сессиясында шыгып соьйлевинде Аталык коршалавшысынынъ йылы, тыстан туьзилетаган авыр аьллерге карсылык этуьв мен, туьрли социаллык куьплери ара бирлестируьв эм беркитуьв идеяларды бардыра берип, енъиллик пен Россия халклар Бирлигининъ йылына коьшкенининъ уьйкен манелигин белгиледи.
«Боьтен де халк бирлигининъ тереннен-терен маьнелиги бар бизим республикамыз уьшин», – деди ол. Регион етекшисининъ соьзлерининъ акыйкатлыгында эш бир шекленмейсинъ.
Белгили болганлай, миллетлер эм динлер ара макулласувлык, тил бирлик тутылувына аьллер туьзуьв – элимиз политикасынынъ бас борышларынынъ бириси. Менимше, боьтен де бу приоритет бизим республикамыз уьшин бек маьнели, неге десе Дагестан – Россиядынъ энъ коьпмиллетли регионы: мунда, коьп ерди бийлеп,
30-дан артык миллетли байыр яшавшылар эм, оьз тиллери эм диалектлери бар 110-нан артык халк ваькиллери оьмир суьредилер. Яшавшылардынъ 90% ювыгы ислам динин тутадылар, а калган кесеги – христианство эм иудаизм динлерин тутувшылар. Дагестан етекшиси Россиядынъ энъ куьшли савыт-садагы – халклар бирлиги деп белгиледи. «Биз бирге болган шаклы, бизди бирев де енъип болмас», – деди Сергей Меликов. Ол согыс спецоперация катнасувшыларына уьйкен оьлшемде коьмек этилинетаганы акында хабарлады. «Биз бирге бизим баьтирлеримиз бен оьктемсиймиз, аьскершилерди, янъы регионлар яшавшыларын соьз бен де, ис пен де яклаймыз», – деди республика етекшиси. СВО ерине бу йыллар ишинде мынълаган тонна гуманитарлык юги (сонынъ ишинде – техника, экипировка,
курылыс материаллар эм азыктуьлик) йиберилген.
Россия халклар Бирлигигинъ йылы ишинде календарьге федераллык дережели тагы да байрам куьнлер косылаяк, сонынъ ишинде – 8-нши сентябрьде белгиленеек Россия халклар тиллерининъ куьни. Онынъ да оьлшемсиз уьйкен маьнелиги бар бизим республикамыз – Россия элимиздинъ энъ коьпмиллетли регионы уьшин.
Соны ман, бирге косылысып, 2026-ншы йылды дослык, бир-биримиз ара анълавлык эм бирлик йылы эсабында шат коьнъилде озгарайык, неге десе Россиядынъ куьш-куватлыгы – онынъ туьрлилигинде эм халклар бирлигинде.
Любовь Уразаева,
«Шоьл тавысы» республикалык газетасынынъ яваплы секретари