Янъыларда Терекли-Мектеб авылынынъ яратувшылык орталыгында Дагестан Республикасынынъ ат казанган маданият куллыкшысы Алимет Аблезовадынъ тувган куьнине багысланып, яратувшылык мерекели кешлиги уьстинликли оьтти.
Бу куьн мунда мерекеши мен бирге сахнага ногайымыздынъ айтылган артистлери: Фатима Нурлубаева, Зульфия Аджигеримова, Мавлимберди Кишинеев,
Айгуль Джумагулова, Гульназ Теркеева шыгып йырладылар.
Кешликти усташа ДР ат казанган маданият куллыкшысы Сабират Казгерей кызы Абубекерова юритти. Шарадынъ барысында мерекеши акында коьп ийги соьзлер
айтылдылар. Ногайлардынъ ДР бойынша «Ногай Эл» регионаллыкмаданият автономиясынынъ председатели Зейдулла Курман увылы Аджибайрамов мерекешиге сонъгы иштелиги болган разылык хат тапшырды: «Сыйлы Алимет Борангазы кызы! Ногай Эл регионаллык ногай миллет-маданият автономиясы сизди алпыс йыллык мерекенъиз бен кутлайды. Бу куьн сизге энъ де ийги йылы йоравларын айтып, узак наьсипли оьмирди йорайды.
Сизинъ кеспи усталыгынъыз республика етекшиси Сергей Меликов пан сизге «Дагестан Республикасынынъ ат казанган маданият куллыкшысы» деген
атты беруьви мен йогары бааланган. Сизинъ конъырав тавысынъыз тек бизим ногай миллетли халкымыздынъ тувыл, баскалардынъ да коьнъилине коьнъил косады, талабынъыз, сизге берилген оьнер болса, коьплеген юреклерди сукландырады.
Сондай ийги куьнде сизге яратувшылык куватты, ден савлыкты, оьнер оьсуьвди йораймыз. Сиз сахнага шыкканда согылатаган карс кагувлар соьнмесинлер, яшав тек яркын бояклар ман боялсын.
Аьдем яшавында энъ де маьнели аьел болганнан сонъ, аьелинъизде дайым наьсип, наьвмет болсын, уныклар, балалар тек суьйинишлер аькелип турсынлар. Оьзинъиздинъ оьнеринъиз эм йырга суьйиминъиз яшав бойында сизге ийги йолдас болсынлар».
Оннан баска болып, мерекешиди бу куьн оьзининъ яшайтаган Карагас авылынынъ аькимбасы Мурат Капашов, Ногай патшалык театрынынъ етекшиси, ДР ат
казанган маданият куллыкшысы Гульфия Кокоева, «Дослар» ТВ етекшиси Даниял Исакаев кутладылар эм Алимет Аблезовадынъ яратувшылык оьнерининъ баалыгын белгиледилер.
Бирге окыган тенълери, маданият тармагындагы ис йолдаслары да мерекешиди кутламай болмадылар. Каравшылар да Алимет Аблезова акында ийги соьзлер эм
йоравларын ога багысладылар. Кешликти мерекешидинъ куьш салувы ман туьзилген «Лашынлар» балалар биюв куьби ярасыклады. Олардынъ бу
куьнлерде етискен уьстинликлери де Алиметтинъ кыйыны ман болган. Бу куьнги шара бек ийги коьнъил коьтерилисте оьтти.
Галима Курганова.
Джамиля аманбаева.