Афганистаннынъ ериннен энъ ызгы болып совет аьскершиси шыккан 1989-ншы йылдынъ увыт айынынъ 15-нши куьниннен бери 37 йыл озды. Афган согысынынъ отыннан мынълаган бизим аьскершилер оьттилер. Яп-яс, аьли де яшав коьрмеген яслар, узак, ят, аьр бир абытта оларды кавыфлык караган ерге туьстилер.
Сонда олар эр кисиге келисли энъ де ийги касиетлер – эрлик, йигитлик коьрсеткенлер. Бу куьнлерде, сол замандагы яс йигитлер, 10 йылга созылган давдагы баьтирликтинъ, данъктынъ, янларын берген аьскер йолдасларынынъ эстелигин саклайдылар.
Сол согысынынъ тири эм арамызда йок баьтирлердинъ сыйына эм эстелигине район орталык китапханасы А.Тахо-Годи атындагы уьлке танув музейининъ Терекли-Мектебтеги филиалында «Незабытая доблесть» деген эрклик дерисин озгарды. Шарада Согыс, Савытлы куьшлер эм ыхтыярсаклав органлар район ветеранлар советининъ председатели Акманбет Сангишиев, Терекли-Мектеб авыл аькимбасы Марат Кулунчаков, Афган согысынынъ катнасувшылары: Мурат Мамаев, Руслан Камалов, Идрис
Межитов, Вахит Койлубаев эм А-Х.Джанибеков атындагы мектебининъ 11-нши «а» класс окувшылары, олардынъ окытувшысы А.Сабутова катнастылар.
Китапханадынъ аьжетсизлев боьлигининъ заведующийи Беризат Бегалиева Афган согысынынъ яралары, йигитлик, алал дослык акында хабарлады. Сол заманларда Совет Аьскери сырасында оьз интернационалист борышларын Ногай район 30-дан артык аьдеми толтырган. Солардынъ сырасында «Кызыл Юлдыз» ордени тапшырылган Адильгерей Аджиевтинъ йигитлиги де бу куьн белгиленди, юреклерге еткен видеоролик онынъ эм бизим арамызда Афган согысынынъ йок ветеранлары акында коьрсетилди.
Эки несилдинъ йолыгысында ясуьйкенлер ясларга йоравларын, маслагатларын айттылар. Афган согысынынъ ветеранлары эм бу куьнлерде СВО барысында аьскер борышларын сыйы ман толтыратаган ердеслеримиздинъ баьтирликлери акында Акманбет Сангишиев пен Марат Кулунчаков айттылар. Афган согысынынъ катнасувшылары Сталинбек Култаев эм Муратали Мамутовтынъ увыллары Джавад Мамутов эм Арсланбек Култаев аталарынынъ баьтир йолын СВО-да бардыратаганын белгиледилер. Сонъ
бу куьнги шарадынъ сыйлы конаклары, авыр болса да, янларына якын эскеруьвлери мен, бир ерлерде де язылмаган кызыклы хабарлары ман боьлистилер. Окувшылар
шынты кызыксынувын коьрсетип, Афган согысынынъ ветеранларына токтавсыз соравлар бердилер. Оларга баьри зат та, тек болган ислер тувыл, бизим ердеслеримиздинъ сезимлери, юрек сызлавы эм сол кыйынлыклардан алган дерислер де кызыклы эди. Бу тыныш болмаган заманларда, элимиздинъ яшавшылары, сонынъ сырасында ясларымыз да, йигитликке шынты баа берип биледилер. Окувшылар уьйкен сый ман, эс берип ветеранлардынъ аьр бир соьзин тынъладылар, сол да коьзге илинмей эм кувандырмай болмады. Б.Бегалиева юриткен пайдалы шарады, конаклардынъ маслагатларын эм эскеруьвлерин олар коьп заманлар эслеринде саклаягына шек йок.
Афган согысынынъ ветеранлары, элимиздинъ тысында болган баска согыс оьзгерислерде катнаскан россия аьскершилери акында эстеликти саклав аьлиги заманда
– савлай элимиз СВО барысында аьскер борышларын толтыраяткан йигитлерди коьтергишлегенде, боьтен де маьнели. Мундай шараларда несиллер байланысы туьзиледи.
Нурият Кожаева.
Суьвретте: шара катнасувшылары.