Бизим шет-кырыйсыз Элимиз дайым энъ авыр заманларда йигитлик эм коркынышсызлык коьрсетип келген оьз баьтирлери мен оьктемсиген. Буьгуьнлерде сол оьрметли аьдетин согыс спецоперация юрген еринде ортакшылык этетаган аьскершилеримиз бардырадылар. Олар шынты патриотизм – ол бос соьз болып калмай, оьзин курманлык этуьвге аьзир болув яшав кеби экенин де коьрсетуьвлери мен, алдына салынган борышын йогары яваплылык пан эм намыслы толтырып келедилер. Аьскер антын беруьвинде, айтпага, «Ант беремен оьз аьскершилик борышымды тийисли толтырмага, эркинликти, Аталыгымызды, халкты, Россиядынъ конституционлык тизимин эм бойсынмаслыгын йигитлерше коршаламага» деген соьзлери бар. Кайсы аьскерши де сол берген антын аклап, Аталыгы алдында алаллыгын коьрсетип келеди.
Эли алдында ант берген юзлеген куватлы эм кайратлы йигитлеримиз, туьрли миллетлер эм динлер ваькиллери оьзлерининъ аьдетке кирген куьндегилик яшавын калдырып, СВО басланувы ман Россия элининъ бойсынмаслыгын, эркинлигин, онынъ халкынынъ баьтирлик аьвелгисин эм ярасыклы келеектегисин коршаламага йолландылар.
Уьш йылдан артык юрген согыс спецоперация барысында шынты баьтирлери аянланып келедилер. Алдышылыкта эм тылда да, токтавсыз аткан ялынлы оттынъ астында, тынык заманларда йигитлик эм йигерлик коьрсеткен йигитлеримиздинъ атлары белгили болып келедилер. Куьн сайын биз газета, журналлар бетлериннен, телеберуьвлерден аьскершилеримиздинъ коьрсеткен йигитликлери мен танысамыз.
Уьстимиздеги йылдынъ канътар айынынъ сонъында Дагестан Республикасынынъ Тарумов эм Ногай районлары бойынша военкоматында СВО катнасувшысы, рядовой Мустафаев Рустам Уруслановичке экинши дережели «За храбрость» медали шатлыклы аьлде тапшырылды. Россия Президенти Владимир Путиннинъ буйырыгы бойынша
беркитилген савга онынъ алдына салынган борышын толтырувда кайратлыгын, йигитлигин аянлап коьрсетти. Бу белги – ердесимиздинъ биринши савгасы тувыл. Оннан
алдын Рустам Урусланович алдышылыкта коьрсеткен йигитликлери уьшин, айтпага, Йигитлик орденине, «За Отвагу» эм «За отличие в службе» медальлерининъ иеси болган.
Олар намыслы эм йогары яваплылык пан оьз аьскершилик борышын толтырувда казанылганлар. Рустам 1986-ншы йылдынъ казан айынынъ 9-ншы куьнинде Ногай районынынъ Кумлы авылында Уруслан эм Аминат Мустафаевлердинъ коьп балалы аьелинде тувган. Мектебти тамамлаган сонъ, 2004-нши йылда, ол Чита областининъ Аргунский районында пограничный аьскеринде кызмет эткен. Бала шагыннан алып Рустамда Элине суьйим эм патриотизм сезимлери кепленип, аьскерши болмага, оьз Элин коршаламага деген мырады оьскен сайын оьрленип келди. Ярым йылдан эр борышын толтырган сонъ, Рустам контрактка кол басып, аьскершилик исин Красноярск, Иркутск калаларында, оннан сонъ Шешен Республикасында бардырып келди.
Согыс спецоперация басланганда, ол шетте карап турмады. 2022-нши йылдынъ увыт айыннан алып «Ахмат» айырым боьлигининъ тизиминде Луганск областинде согыс оьзгерислеринде ортакшылык этип келеди. Штурм бригададынъ командири, мергин Рустам Урусланович согыс урыслардынъ бирисинде алдына салынган борышын
толтырувда аягына каты яраланды эм куьшли контузия да алады. Белгородта госпитальде ятып шыккан сонъ, ол уьйине эмленуьвин бардырмага йибериледи. Янъыларда Рустам эм Залинадынъ курган аьелинде коьптен саклаган сылув кызлары Медина тувып, олардынъ аьелине битпес суьйиниш аькелди. Медина оьскенде, оьзининъ Аталыкты шынты саклавшысы, йигит атасы ман келеекте оьктемсиегине соьз йок.
Гульмира Нурдинова.
Суьвретте: СВО катнасувшысы Рустам Мустафаев.
