Аталыкты саклавшыдынъ куьни алдында «Шоьл тавысы» республикалык газетасынынъ редакциясында Ногай районынынъ согыс, ис, Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев, Ногай районынынъ Ямагат
палатасынынъ председатели Эльмурза Саитов, яс офицерлер, СВО катнасувшылары Роман Бабаев, Рустам Мустафаев пен йолыгыс оьтти.

Йолыгысты баслаятып, бас редактор Эльмира Кожаева сыйлы конакларды эм ис йолдасларды келеяткан данъклы байрам ман йылы кутлады.
– Мине мундай йылы аьлде, таьтли сыпыра артында биз дайым да согыс спецоперациясынынъ катнасувшылары ман да, бизим белгили эм оьрметли аьдемлеримиз бен
де йолыгыслар оьткеремиз. Редакциямызда солай ок тоьгерек столлар, балалар уьшин конкурслар да уйгынлап озгарамыз. Буьгуьн биз аьскер кийимин кийген аьдемлерге, бизим баьри эрлерге, Аталыкты саклавшыларга эрликтинъ, данъклыктынъ, бизим мактавлы Савытлы куьшлердинъ байрамы алдында уьйкен разылыгымызды билдиремиз, – деди Эльмира Кожаева.
Ол биринши соьзди конаклардынъ энъ уьйкени Акманбет Мусаевичке берди. Район ветеранлар советининъ етекшиси республикалык газетасынынъ коллективине ийги конакбайлыгы уьшин разылык билдирип, согыс эм ис ветеранлар совети эм оьзи атыннан баьри йыйылганларды келеяткан сыйлы байрам ман кутлады.
Оьзининъ соьзин кутлавдан солай ок Ногай районынынъ Ямагат палатасынынъ председатели Эльмурза Саитов та баслады.
Онынъ айтувына коьре, ювыклап келеяткан данъклы куьн баьри россия халкы уьшин ортак байрам болады.
– Буьгуьн биз баьри карасымызды эм баьри эсимизди согыс спецоперациясынынъ юрисине каратканмыз. Аьр куьнимизди эндиги биз сондагы аьллер калай, бизим яслар
нешик экен деген навасыз соравлардан баслаймыз. Буьгуьнлерде бизим коьп ясларымыз СВО-да катнасадылар, олардынъ бир хыйлысы йигитлерше янларын да бергенлер. Сол ян берген ясларымыздынъ аьр бириси, эгер аьел курып яшаган болса, олардынъ аьр бирисинде 3-4 бала болып, халкымыз санына 100-ден артык аьдем эсабы косылган да болар эди. Бизим эл бу давда енъмеге керек, енъмеге борышлымыз, баскалай биз баьримиз де кул болып токтаякпыз. Сыйлы Рамазан айынынъ алдында бизим ясларымыз бу давдан аман калып, уьйлерине аман-эсен кайтсынлар деп йораймыз, – деп билдирди оьз ниетин Эльмурза Саитов.
Согыс спецоперация аьрекетинде оьзининъ катнасувы акында капитан Роман Бабаев: «Бизим исимиз солдат иси, бизге буйырадылар – биз буйырыкты толтырамыз. Аьскерши аьдемлердинъ яшавы солай», – деген соьзлерден баслады. Ол 2022-нши йылдынъ 26-ншы февралиннен алып, СВО ишинде болып келген. Март айында олар Кривой Рог каласына 60 шакырым йол етпей токтаганлар. Онынъ айтувына коьре, операциядынъ баслапкы аьсеринде аьскер боьликлери арасында байланыс осал болган. Дав сулыбы аьскершилерге сонъында, согыс майданында келди.
– Бизди Каховск ГЭС-не баратаган йол ман йибердилер, сонынъ артында Велико-Александровка бар эди. Сонда биз бир юма турдык. Мунда командирлер, мага коьре, оьз карталарына караган сонъ, биз баьри аьскер боьликлерден озып кеткенимизди эслеп, бизди кери ызымыз бан Токмакка кайтардылар. Коршаланув министерствосынынъ бас борышы деп илгери карап юруьв, душпаннан авылкалаларды тартып алув борышы саналады. Бизим бас борышымыз – ол аьр бир уьй меканды, манъгазыды, уьйлердинъ йогарларын явдан тазалав, неге десе биз спецназ отрядында эдик.
2024-нши йылда мен аьскершиликте куллык эткенли 25 йыл толувы ман байланыслы тийисли пенсияга шыгарылдым. Соьйтип, СВО-дан кайтарылдым, аьлиги заманда тувган Терекли-Мектеб авылында тураман, – деп кутарды соьзин Роман Бабаев. Аьскершилик бактысына коьре, бизим экинши конагымыз, СВО ортакшысы, капитан Рустам
Мустафаев те 2022-нши йылдынъ басыннан алып давдынъ алды сызыгына туьсип калган. Ол спецназдынъ штурм бригадасынынъ командири болган саялы, аьр дайым да оьз бригадасы ман бизим аьскерлердинъ алдында юретаган эди. Онынъ соьзлерине коьре, спецназ штурмовиклердинъ бас борышы – явдынъ позицияларын тартып алув эди.
– Согыс спецоперациясынынъ басында бизде тек 15 аьдем бар эди. Биринши йыл СВО-да мен уьшин яман оьтпеди. Экинши йыл дегенде «огырсыз куьллелердинъ»
бириси мени тапты, яраландым. Оннан сонъ тагы да бир кере яра алдым.
Мен Луганск бойындагы согысларда катнасканман. Северодонецк эм Лисичанск деген эки калаларды явдан босатувда ортакшылык эттим. Эки ай узагында каты согыслар болып турдылар, ама биз бу калаларды да душпаннан босаттык. Меним аьли 4 савгам бар. «Йигерлик уьшин» деген 2-нши дережели медаль йыл ярымнан артык заман мени излеп тапкан. Буьгуьнлерде ярадан сонъ савлыгым бойынша уьйде тураман, ама мени кайсы куьн де СВО-га шакырмага боладылар, – деп боьлисти оьз эскеруьвлери мен Рустам Мустафаев.
Конакларды келеяткан байрам ман редакция ветеранлары: яваплы секретарь Любовь Уразаева эм политика боьликтинъ редакторы Магомет-Али Ханов та кутладылар. Любовь Ибрагимовна СВО катнасувшыларына олар Россия уьшин кыйынлы заманда, оьз янларын аямай, тувган Элдинъ биринши шакырувы ман ок оны коршалавга
коьтерилгенлери эм оьз атларын дайымга данъклаганлары уьшин разылыгын билдирди. Онынъ айтувы ман, Аталыкты саклавшы куьни алдынгы йылларда Кызыл
Аьскердинъ эм Флоттынъ куьни, оннан сонъ Совет Аьскердинъ эм Согыс-Тенъиз Флотынынъ куьни деп аталган, ама сонынъ аты кайтип туьрленгенине де карамастан,
ол аьр дайым да савлайхалклык байрамы, бизим мактавлы Армиядынъ, йигитликтинъ эм оьктемликтинъ белгиси болып калады.
М-А.Ханов.
Суьвретте: йолыгыс аьсеринде.