Янъыларда «Бирлик-Единство»деген волонтерлык куьби алдышылыкка мерекели етписинши кере гуманитарлык югин йиберди. Согыс спецоперация басланганнан алып Нефтекум округындагы Коясыл авылыннан «БирликЕдинство» волонтерлык куьби савлай Элимиз бен бирге «Баьри зат фронт уьшин, баьри зат та Енъуьв уьшин» деген шакырув астында бирлесип келеди. Гуманитарлык югин йыювдынъ аьр бир катнасувшысы ярдамды йиберуьвлери мен аьскершилеримизди коьтергишлемеге, олардынъ куьнделигин енъиллетпеге, Енъуьвге сенимди сездирмеге ярдамласып келедилер.
Ердеслеримиз аьскершилеримиздинъ артында савлай элимиз турганын коьрсетип калмай, оларды коьнъиллендируьв уьшин посылкалар ман бирге, тынышлык яшавдынъ
кесегин де йиберип келедилер.
Олардынъ бас мырады – аьскершилеримиздинъ юреклерин йылытув, тылда турганлардынъ ярдамын сездируьв болады. Олар, аьскершилеримиз бизим ярык келеектегимиз
уьшин куьресип келген заманда, шетте карап турып болмайдылар.
Сол маьнели оьзгеристе согыс спецоперация юрген ериннен «Газель» автокоьлигинде йыйылган ярдамды оьзлери мен аькетпеге келген аьскершилери Рустам эм
Германнынъ катнасувлары юрекке якын эм йылы йолыгыска айландырды. Сол куьн Константиновское направлениесине аьскершилерди явдынъ куьллесиннен коршалав уьшин согылган йырма шилтерлери, эки юз окоп майшыраклары, йылы кийим, эмленуьв уьшин керекли туьрли дарманлар, азык-туьлик йиберилди. Волонтерлар гуманитарлык югин йыювда эм йиберуьвде оьз уьлисин косканлардынъ аьр кайсысына да, баска болып, Олег Николаевич Мурадовка, мектеб окувшылары Тамерлан
Рамазановка эм Султан Елгушиевке юкти коьликке тиевде эткен уьйкен ярдамлары уьшин юрек разылыгын билдирдилер.
– Биз яны авырыган баьри ердеслеримиз алдында басымызды тоьмен иемиз. Бу мерекели йиберилетаган гуманитарлык ярдамы сизинъ демевлигинъиз аркалы йыйылды, эм келеекте де сол исимизди бардырмага бизге куьш береди. Биз келеекте де аьскершилеримиз акында каьр шегип, оларды Кудай оьзи коршалап, аманэсен кайтканын тилеп келемиз. Биз бирге болган шаклы – бизди яв бир де енъип болмас! – дейди «БирликЕдинство» волонтерлык куьбининъ агзалары. Белгилеп озайык, Дагестан Республикасындагы Ногай районынынъ яшавшыларыннан тизилген «Неравнодушные сердца» волонтерлык куьби де согыс спецоперация юрген ерге гуманитарлык
югин йыйы йибермеге шалысады.
Сол волонтерлык куьби аьскершилерге буьгуьнлерге дейим де шилтерлерин согып, гуманитарлык югин йыйып эм йиберип келедилер. Тезден СВО катнасувшыларына кезекли гуманитарлык ярдамы йыйылып йиберилеек.
Г.Нурдинова.
Суьвретте: «БирликЕдинство» волонтерлык куьби гуманитарлык югин йиберуьв мезгили.