Былтыр 1-нши ноябрьден алып «Шоьл тавысы» республикалык газетамыздынъ редакциясы тувган тилден ятлав, хабар, сочинение бойынша авыл мектеблерининъ окувшылары эм газета окувшылары арасында «Ынанмайман тилди муттым дегенге» деп аталган конкурс оьткерген эди. Бу конкурста Ногай районынынъ орта мектеблерининъ окувшылары, газетадынъ айырым окувшылары катнастылар. Конкурска деп йиберилген баьри колязбалар ноябрь-январь айлары ишинде газета бетлеринде баспаландылар.

Конкурстынъ тамамлары янъыларда келтирилип, сонынъ енъуьвшилерин эм катнасувшыларын редакцияда шатлыклы аьлде савгалав болып озды. Бу шарады ашаятып, газетадынъ бас редакторы Эльмира Кожаева халктынъ яшавында эм бактысында тувган тилдинъ орынын, сонынъ оьсип келеяткан яс несиллерди тербиялавда туткан уьйкен маьнесин айтып белгиледи. «Халклар ара тувган тиллер куьни алдында биз айлак та оьткир кепте миллет тиллердинъ йойылып барувын сеземиз эм соларды саклав эм оьрлентуьв уьшин баьри куьшимизди салмага шалысамыз, неге десе ана тили мен бизим халк аьдетлеримиз эм маданиятымыз тар байланыслы. Янъыларда биз конкурсымыздынъ сырагыларын келтирдик эм енъуьвшилерди белгиледик», – деди ол.
Э.Кожаева конкурстынъ енъуьвшиси, Кадрия орта мектебининъ 9-ншы «а» классынынъ окувшысы Алим Толубаевке 1-нши орынды эм 5 мынъ маьнет акшалай баргыды тапшырды. Экинши орынды бийлеген Куьнбатар авылдынъ М.Курманалиев атындагы орта мектебининъ 7-нши классынынъ окувшысы Ясмина Эдильбаевага 3 мынъ маьнет эм конкурстынъ энъ де яс катнасувшысы (3-нши орын) – А-Х.Джанибеков атындагы орта мектебининъ 1-нши классынынъ окувшысы Солтанат Язлыбаевага 2 мынъ маьнет акшалай баргылар берилди.
Конкурста ортакшылык эткен Кадрия атындагы орта мектебининъ окувшылары: Залим Бегендиковка, Рамиль Худайбердиевке сый грамоталары тапшырылды.
Соны ман бирге Карагас авылдынъ К.Кидирниязов атындагы, Орта-Тоьбе авылдынъ орта мектеблерининъ окувшылары Азиза Аджигельдиева ман Хадижат Култаева да сый грамоталарына тийисли болдылар. Сондай
Сый грамотага эм айырым савгага солай ок газетадынъ окувшысы эм бу конкурстынъ ортакшысы, Терекли-Мектеб авыл яшавшысы Салимет Кельдасова да тийисли этилинди.
М.Юнусов.
Суьвретте: «Ынанмайман тилди муттым дегенге» конкурсынынъ енъуьвши окувшылары.