Ногай районынынъ билимлендируьв учреждениелеринде Халклар ара ана тил куьнине багысланган шаралар озгарылды. Кадрия атындагы мектебининъ биринши классынынъ окытувшысы Земфира Кайтарбий кызы Уразаева (суьвретте) «Ана тилим – ногай тил» деп аталган ашык дерис оьткерди. Класс ногай язувшылардынъ суьвретлери мен стендлер, китаплер выставкасы ман келбакланган. Окытувшы балаларга байрам акында хабарлады.
Ол саьбийлерге ана тилин не уьшин суьймеге эм сакламага керегин анълатады. Деристе ойын кеби де кулланылды. Земфира Кайтарбий кызы соьзлерди орыс тилинде айтады,
балалар сол соьзди ногайша яваплайдылар.
Олар юмаклар шештилер, такпаклар эм айтувлар айттылар, олардынъ маьнесин анълаттылар, белгилер бойынша йыл шакларын шешип болдылар. Солай ок окытувшы ногай халкынынъ аьдетлери акында хабарладылар, балалар ойыншык айванлардынъ атларын ногайша эм орысша айттылар.
Окувшылар дагестан эм ногай шаирлерининъ ятлавларын окыдылар: Аскербий Киреевтинъ, Мурат Авезовтынъ, Гульфира Бекмуратовадынъ, Джамиля Аманбаевадынъ, кумык шаири Гебек Конакбиевтинъ.
Дериске конак болып келген «Шоьл тавысы» республикалык газетасынынъ корреспонденти, Россия Язувшылар союзынынъ агзасы Гульфира Бекмуратова ногай тилинде кайдай журналлар эм газеталар баспаланатаганы, газета тилди саклав эм таралтув ниет пен кайдай куллыклар юритетаганы акында хабарлады. Дерис кызыклы оьтти. Сондай шаралар бек маьнели, олар ана тилин саклавга каратылган.
Г.Абдулакимова.