ДР Аькимбасы Сергей Меликовтынъ етекшилиги астында оьткен кенъесте ДР билимлендируьв эм илми министри Яхья Бучаев шыгып соьйлеп, мектеблер
директорларынынъ аттестациясы акында билдирди.
Муннан алдын директорлардынъ аттестациясы оьткени бойынша тергевлер юритилип, квалификациясын ыспатламай, куллык этуьвди бардырганлар
аянланды. Соны ман, 60 директорлар аттестациясыз ислеп турганлар, а 11 муниципалитетлерде 17 директорлар, ДР Билимлендируьв эм илми министерство
ваькилининъ ой-токтасына карамастан, аттестацияды оьткенлер деп саналган.
Министрдинъ соьзлерине коьре, муниципалитетлерге директорлар ман келисуьвлер туьзуьвге, аттестациядынъ уьш йыллык планларын беркитуьвге
эм кеспили конкурслар енъуьвшилерин белсенлик пен иске киритпеге маслагат берилген.
Кабыл этилип алынган шаралар аркасы ман 60 директорлардынъ 51-и 2026-ншы-2027-нши йылларга аттестация графигине киргистилгенлер, 9 етекшилер
исиннен босатылганлар, баьри муниципалитетлер уьш йылга алдын аттестация планларын беркиттилер.
– Билимлендируьв учреждениелерининъ аьрекети тийислисинше юритилуьвине керекли туьрленислер 1-нши июльге дейим киритилмеге керек. Эгер
сога дейим этилинмесе, бу яктан борыш, сонынъ ишинде директорларды беркитуьв бойынша да, республика басшылыгына коьшеек. Биз оьзимиз мектеблерди басшылап болаяк етекшилерди беркитеекпиз, – деп белгиледи Сергей Меликов.
Онынъ соьзлерине коьре, законсыз аттестацияды оьткен деп аянланган директорлар окув йылы тамамланувга квалификациясын аянламага тийислилер.
Мектеблердинъ штатлык расписаниелери акында айта берип, Яхья Бучаев расписаниелерди туьзуьвде МО аькимбаслары ман соьйлесип токтастырмага
маслагат берилгенин эске салды. Ведомстводынъ билдируьвине коьре, бу иске республикамыздынъ баьри калаларында эм районларында киристилер.