Сыйлы Рамазан айынынъ куьнлеринде Ногай районынынъ яшавшылары согыс спецоперация юрген ерге кезекли гуманитарлык ярдамын аьзирлеп йиберди. Сыйлы айынынъ басланувына уйгынланган гуманитарлык юги аьскершилердинъ керексинуьвлери бойынша кепленип аьзирленген эди. Бу киели айда аьскершилеримизге коьтергишлев этуьв бек маьнели, неге десе олардынъ коьбиси оьз уьйиннен алыс ерде, авыр аьллеринде ораза тутып келедилер.
Гуманитарлык ярдамын этуьвде маьнели уьлисин «Дагестан» Этномедиахолдинг ГБУ-нынъ «Шоьл тавысы» республикалык газетасынынъ ис коллективи де косты.
Газетамыздынъ бас редакторы Эльмира Юнус кызы Кожаевадынъ етекшилеви астында журналистлер аьскершилеримизге кагыт кутыкларына туьрли азык-туьликлерин, таьтли зияпетлерин, йылы кийимлерин, ювырканларын, гигиена амалларын, дарманларын эм сондай баска затларын ерлестирдилер. Посылкаларда газетадынъ янъы номерлери де айырым орынды алдылар. Согыс спецоперациядынъ басыннан алып, газетадынъ бетлеринде аьр юма сайын согыс оьзгерислери юрген ерде баьтирлик эм коркынышсызлык коьрсетип келетаган ердеслеримиздинъ, олардынъ дав майданларда ялынлы отлар ишинде
коьрсететаган йигитликлери акында очерклер, репортажлар, зарисовкалар кебинде баспаланып, окувшыларга таныс боладылар. Баска болып, газета бетлеринде аьскершилердинъ эм олардынъ аьеллерининъ ортакшылык этуьви мен район бойынша шаралары акында макалалар да йыйы баспаланадылар.
«Шоьл тавысы» газетасынынъ куллыкшылары уьшин бу биринши саваплык акциясы тувыл. Баска организациялар ман бир сырада журналистлер аьскершилерди явдынъ куьллесиннен коршалайтаган шилтерлерин согувда да белсенли катнаспага шалысадылар, гуманитарлык югин йыйып йиберуьвде де бир де шетте калмайдылар. Ай сайын редакцияда кыска болжалга тыншаювга келген согыс спецоперация катнасувшылары ман йылы эм эсте калатаган йолыгыслар озгарадылар, аьскершилердинъ аналары эм кардашювыклары йыйы редакция меканынынъ сыйлы конаклары болып келедилер.
Навруз айынынъ биринши куьнлеринде йыйылган гуманитарлык юги Ногай районыннан аьскершилерге эм олардынъ касында бирге кызмет этетаган йолдасларына, согыс спецоперация юрген ердеги туьрли фронтларына еткерилдилер. Белгилеп озайык, согыс спецоперациясы басланганнан алып, савлай
элимиз бойынша аьскершилеримиз уьшин гуманитарлык ярдамын йыюв бойынша аьрекети белсенли юреди.
Сол саваплык аьрекети туьрли яслы эм миллетли аьдемлерин бирлестирип, тыпакластырады. Ногай районы, савлай Элимиздей болып, согыс спецоперацияда ортакшылык этетаган аьскершилерге дайымлык негизинде уьйкен гуманитарлык коьтергишлевин токтатпайды. Олардынъ аьр кими де биргелес аьрекетлеви аьсиретли саклаган енъуьвди ювыклатаягына бек сенедилер.
Г.Нурдинова.
