Халклар ара Хатын-кызлар куьнининъ алдында Дагестан Аькимбасы Сергей Меликов исинде уьйкен уьстинликлерге етискен дагестанлы хатынларга патшалык савгаларын тапшырды. Уьйкен оьктемлик пен савгаланган хатын-кызлар сырасында «Шоьл тавысы» республикалык газетасынынъ
корреспонденти Нурият Кожаева бар экенин белгилеймиз, ол «Дагестан Республикасынынъ ат казанган журналисти» деген атка тийисли болды.
Нурият ерли редакцияда 2009-ншы йылдан алып куллык этеди. Сол йыллар ишинде онынъ калеми астыннан мынълаган терен ойлы, кызыклы, ясларды тербиялаган макалалар, эсселер, очерклер шыккан, оьзин яваплылы, билимли, куллыксуьер куллыкшы этип коьрсетти.
Нурият Кожаева белгили ногай язувшысы Магомет Янмурза увылынынъ ногай аьдетлерге, ана тилин баалавга уьйкен эс берилген аьелинде тувган, эм сол да болаяк журналисттинъ касиетлери кепленуьвине эм кеспиди сайлавына себеплик эткен болар. Журналисттинъ коьп ислери ногай тилин саклавга, оны несилден-несилге коьшируьвге багысланады эм макалалары ата-бабаларымыздынъ аьдетлерин сыйлавга эм баалавга каратылганлар. 2022-нши йылдан алып Нурият Кожаева баьтир ердеслеримиз – СВО катнасувшыларынынъ йигитликлери акында юзлеген очерклер язган. Онынъ йогары патриотизмли макалалары туьрли дагестан прессасында, Сырт Кавказ эм федераллык коьлем информация амалларында да орын тавып келеди.
Нурият Кожаева – 2010-ншы йылдан алып РФ Журналистлер союзынынъ агзасы. Онынъ кеспилик йолы ДР Россия Журналистлер союзынынъ Дагестан регионаллык боьлигининъ, Баспа эм информация министерствосынынъ, Ногай район администрациясынынъ Сый грамоталары ман белгиленген.
«Шоьл тавысы» газетасы етекшилиги Дагестан Аькимбасы Сергей Меликовка, РФ Государстволык Думасынынъ депутаты Бийсултан Хамзаевке, ДР Баспа эм информация агентствосынынъ етекшиси Арсен Юсуповка, баска болып, Ногай районынынъ аькимбасы Джамалутдин Эсиргеповка газета корреспонденти Нурият Кожаевадынъ ис аьрекетине йогары баа берилгени уьшин оьз разылыгын билдиреди.
«Шоьл тавысы» республикалык газетасынынъ куллыкшылары оьз ис йолдасын тийисли савга ман кутлап, ога берк ден савлык, келеекте де яратувшылык етимислерин йорайды.
Эльмира Кожаева, «Шоьл тавысы» республикалык газетасынынъ бас редакторы.