Ногай районымызда талаплы саьбийлер саны аз тувыл, ызгы заманларда окувшылар туьрли конкурсларда катнасып, енъуьвши, савгалы орынларга етисти деген билдируьвлер коьп эситиледилер. Олардынъ уьстинликлерине биз де суьйинемиз, етекши окытувшыларын ак юрегимизден кутлаймыз.
Бу куьнлерде яс аьдемлер ийги оьмирде яшайдылар, оларда мырсатлар да коьп.
Ногай халкым терен ойлы аьдемлерине дайым да бай болган, ама баьримизде де аьлигидей амаллар болмаган. Бу куьнлерде балалардынъ алдыларында коьп ашык йоллар болганы бизди, яшав сулыбы болганларды, кувандырады, аьр кайсысына да тек бийик ушувларды, илми тавдынъ тоьбесине етискенди йорап турамыз.
Мени аьли бек кувандырды Аиша Темирбулатовадынъ бу куьнлерде етискен уьстинликлери. Аиша – Ногай районымыздынъ ТереклиМектеб авылынынъ А-Х.Джанибеков атындагы мектебининъ бесинши класс окувшысы. Ол бек талаплы эм билимли окувшылар саныннан болады.
Аиша мектебке келгенлей ок, эсап сабагына суьйимин эм оьзининъ тек алдыга бармага уьйкен аваслыгы барын коьрсетип келеди. Мектеб ишинде, район, республика кезегинде, онынъ аз сулыплы мектеб йыллары ишинде етискен уьстинликлери аз тувыл. Аишага ийги коьрим онынъ аданасы Амин де болган эм болады, бу куьнлерде онынъ насихатшысы – аданасы деп айтпага да йолымыз бар.
Аишадынъ анасы Зульфирадынъ билдируьвине коьре, ол кызы бу йолды сайлар деп ойламаган эди эм ушынын айтатаган болсак, анадынъ кызына эткен ниетлери баска болыпты. Амал йок, Аминнинъ маслагатлары, оьзи де дайым уьлги болып, Аишады да эсап сабагы ман терен каьр шегуьв йолына
онълады. Алдыда не болаягын заман коьрсетер…
Бу окув йылдынъ басланувы ман Аиша эсап сабагы бойынша заьлимдей олимпиадаларда ортакшылык этти, аьр кайсысы да ога уьстинлик эм сулып аькелди.
Тек янъыларда Аиша оьзи окыйтаган мектебининъ окытувшыларынынъ, тенъ йолдасларынынъ йылы кутлавларына тийисли болды. «Пифагор» эсап олимпиадасынынъ республикалык кезегининъ енъуьвшиси болып келген Аишага патшалык байрагын коьтеруьв амалы да берилди.
– Аиша алдыга ымтылысы куьшли кыз, ол заман заманы ман эсап борышлары уьстинде ислеп турады, – деп айтадылар онынъ окытувшылары. Сол ийги касиетин онынъ анасы да белгилейди.
– Уьйкеним Амин, ол да эсап бойынша коьп уьстинликлерге етисти, Аишага да уьйкен эс этип, оьзининъ билгенин оннан аямай, тек уьстинликлерге даьврендирип турады – алдынъда сынавлар коьп, бас сынав деп, Сириус олимпиадасын сана эм сонда ортакшылык этпеге аьзирлен, – деген бир маслагатын эситкенмен. Оьзек те, мен де оьз ягымнан балама коьмекши болмага шалысаман, – дейди Зульфира. Аьр кайсымыз да, Зульфирадай болып, балаларымызга тек яхшылыклар йораймыз эм ашык йолларды тилеймиз. Алдыда Аишага тек енъуьвлерди эм эсап сабагынынъ кайдай кыйын борышларын да енъиллик пен шешкенин сагынаман.
Г.Сагиндикова.
Суьвретте: А.Темирбулатова.