Дагестан Республикасынынъ Ногай районынынъ Карасу авылынынъ яшавшысы Вагаб Эльмурза увылы Османов районымыз бойынша «Тавлар эси» СВО ветеранларынынъ Ассоциациясынынъ председатели болып сайланган.
Ветеранлар Ассоциациясы гражданлардынъ патриотлык тербиялавы, Аталыкты саклавшыларынынъ эсин оьмирлетуьв, ветеранлар арасында спортты таралтув, СВО катнасувшыларынынъ аьеллерин коьтергишлев, ветеранлардынъ ыхтыярларын эм кызыксынувларын коршалав соравларын карайды.
Энъ де баслап, Ассоциация яшавында кыйынлыклар ман раскан йолдасларды бирлестиреди. Бу ямагат организация болса да, ол патшалык органлары ман тар байланыста аьрекетлейди.
Вагаб Османов 2022-нши йыл мобилизация бойынша СВО ерине кеткен. Повесткады колына алганда, ол бир такыйка да ойланмады: яс билетаган эди – кыйынлы заманларда Аталыкты саклавга турмага керек эр йигит. Согысувлардынъ бирисинде Вагаб яраланды, эмленген сонъ йолдаслары ман
согыс спецоперациясына кетти. Экинши ярасы айлак авыр болды, ден савлыгы бойынша оны уьйге кайтардылар.
Вагаб Османов Карасу авылында яшайды, авылшылар оны авыл советининъ депутаты этип сайладылар, сонъында СВО ветераны Ногай районынынъ депутатлар Йыйынынынъ депутаты этип сайладылар. Ол оьз авылынынъ кызыксынувлары ман каьрлеп, яшайды.
Янъыларда «Ногайский район» МР аькимбасы Джамалутдин Айнадин увылы Эсиргепов СВО катнасувшысы Вагаб Османовты Ногай районы бойынша «Тавлар эси» СВО ветеранларынынъ Ассоциациясынынъ председателининъ куллыгына туьспеге амаллар алды.
– Бизим организация СВО катнасувшыларынынъ маьселелери, оларга эм аьеллерине коьмек этуьв соравларын шешеди. Мен янъыларда ислеп басладым, бизим бас борышымыз – ясларымызга коьтергишлев болмага, туьрли соравларды ойласпага, шешпеге: ЖКХ, социаллык, сес-хабарсыз йойытылган
аьскершилерди излев, ян берген СВО катнасувшыларынынъ аьеллерине коьмек этуьв. СВО ерине гуманитарлык коьмегин этемиз, айырым эс окувшылар ман ислевге, оларда патриотизм сезимлерин эндируьвге беремиз.
Биз «Яслык» яслар орталыгы ман, мектеблер мен, УСЗН боьлиги мен, «Шоьл тавысы» республикалык газетасы ман бирге ислеймиз, – деп хабарлайды ямагат организациясынынъ куллыгы акында Вагаб Османов.
Алдыда коьп мыратлар, проектлер эм борышлар. Биз Вагаб Османовты сондай яваплы куллык пан кутлаймыз, исинде уьстинликлер йораймыз.
Г.Бекмуратова. Суьвретте: В.Османов.