Согыс спецоперация еринде эр борышын толтырувда йигитлерше ян берген аданасым Рашидхан Ханмурзаевке багыслайман

Ах, дуныя, ялган дуныя бузылды,
Картлыгына нешев етпей уьзилди,
Тамырлары куьни етпей курыды,
Мыратларды кара кавга урлады.

Ашшы хабар юреклерди тырнады,
Ашшы туздай, яраларды каплады.
Наьлет кавга аьзизимнен айырды,
Куьннинъ коьзи биз бен бирге кайгырды.

Ак кепинге аявлымды орадынъ,
Ап-ак кыста кара ерди козгадынъ.
Хатынларга кара явлык байладынь,
Ах, Кудайым, неге бизден сайладынъ?

Анамыздынъ самайларын агартып,
Коьзяслардан явды явын уьйиме.
Ясадылар явдынъ кара алаты
Бир тыртыктан бир тыртыкты бетиме.

Бу дуныядынъ наьсибине тоймадынъ,
Сеникиндей юрек бизде болмаган!
Эр йигиттинъ эр юреги Элине!
Сен янынъды, Рашид, бермей калмадынъ.

Заман озып, яшав йолы барады,
Куьннинъ коьзи кеш болганда батады,
Тек битпеек юректеги ярамыз,
Дайым эсте, юрек калай шаншады.

Сенинъ уьшин бу яшавды курармыз,
Оьрметинъди эм сыйынъды тутармыз.
Янынъ энди тыныш тапсын Кудайда
Еннет капы кенъ ашылсын алдыда.

Ак булыттан сен карайсынъ оьзиме,
Эш мутылмас атынъ сенинъ оьмирге.
Йигит оьлсе, аты калар дуныяда,
Оьктем болдынъ сен, Баьтирим, Элинъе!

Дав майданды коьп Баьтирлер коьтерген,
Явга карсы яшавларын коьмдирген.
Ер юзине Элимизди данък эткен,
Енъуьв куьнге уьмитлерди сендирген.

Алтынай Ханмурзаева,
Терекли-Мектеб авылы.
07.02.2026 йыл.