Ораза байрамы алдында Кадрия атындагы мектеби «Россия элимиз, Енъуьв эм Президентимиз уьшин» деген шакырув астында, согыс спецоперация оьткен ерлерде эр борышын толтыратаган йигитлерге гуманитарлык юк йибердилер. Окытувшылар, окувшылар эм олардынъ ата-аналары бизим заманнынъ баьтирлерине керекли болган затларды эм азыкларды йыйнап- аьзирледилер. Аьр бир ящикте азыклар эм кийимлер бирге тувган уьйдинъ йылувынынъ, ердеслер коьтергишлевининъ бир кишкей кесеги де бар, соны ман бирге бу каьр шегуьв – бизим аьскершилерге олар ман баьри де оьктемсийтаганын эм сагынышлы куьтетаганын эске салув болады. Бу куьн оларды явдынъ дронларыннан саклар деген уьйкен сеним мен ясырынатаган шилтерлер де йиберилди.
Кадрия атындагы мектеби СВО катнасувшыларына ярдам этуьвге каратылган гуманитарлык акцияларда дайым да катнасады.
Балалардынъ да бу исте ортакшылык этуьви, оьзек те, оьктемситпей болмайды. Мунда бизим баьтирлерге ярдам этуьв мен бирге яс несилди патриотлык яктан тербиялав иси де бирге барады. Окувшылар уьйкен ящиклерди аявлап коьтерип, газель коьлигине элтеп, уьсти-уьстине туьзетип салувына куьезленип карамай болмайсынъ. Аьскершилеримиз уьшин каьр шегуьвин коьрсеткен, ортак иске, оьзининъ кишкей болса да, уьлисин коспага ымтылган ясларды коьрип, элимиздинъ келеектегиси уьшин рахатланасынъ. Балаларды соьйтип тербиялаганлары уьшин окытувшыларга эм ата-аналарга – уьйкен разылык.
Аьскершилерге посылкалар йыйналган мезгилде мектеб етекшиси, ДР ат казанган окытувшысы, СВО катнасувшысынынъ хатыны Альфия Акимова Кадрия атындагы мектебининъ ис коллективи РФ Президенти Владимир Путиннинъ политикасын белсенли яклайтаганын билдирди. Альфия Амирхановна элимизге кыйынлы заманларда СВО барысында элин коршалаган йигитлерди эм олардынъ аьеллерин колдан келген шаклы коьтергишлемеге керекли экенин белгиледи.
ДР ат казанган окытувшысы, РФ билимлендируьв эм тербиялав сыйлы куллыкшысы, мектебтинъ «Истории специальной военной операции» музейининъ етекшиси Марина Межитовадан биз гуманитарлык юк 3-4 куьннинъ ишинде йыйналганын эситтик. Онынъ соьзлери мен, бир класс та шеттен карап калмады. Оьз соьзинде Марина Межитова йигитлер тезден енъуьв мен уьйлерине кайтар деген сенимин айтты.
Шарага дин аьрекетшилери: Ногай район имамлар советининъ председатели Мухтар Мусаев эм Терекли-Мектеб авыл имамы Мухаммад Атангулов, солай ок «Шоьл тавысы» республикалык газетасынынъ бас редакторы Эльмира Кожаева шакырылдылар. Конаклар мектеб етекшисине СВО катнасувшыларына гуманитарлык юк йыйнап, йиберуьвин уйгынлаганы уьшин савболын айттылар.
Эльмира Юнусовна Кадрия атындагы мектеби согыс спецоперация басланган 2022-нши йылдан алып СВО-га бир неше кере гуманитарлык юк йибергенин, бу мектебте окувшыларды патриотлык яктан тербиялавга багысланган уьйкен куллык юритилетаганын белгиледи.
Дин аьрекетшилери аьр бир окувшыдынъ касиети туьзилуьвде окытувшыдынъ туткан орыны айлак та уьйкен экени акында айттылар.
Олар бизим заманнынъ баьтирлери – СВО катнасувшыларын, юреклеринде Элине каратылган суьйимин йылдан-йылга берките берип, окытувшылар тербиялаганын айттылар.
– Баьтирлер оьлмейдилер, олар оьлимсизликке абытлайдылар. Биз аьр биримиз кайзаман болса да, дуныядан кешеекпиз, Эл коршалавшылар болса, дурыслык уьшин куьресип, Аталыгын явдан саклап, янларын бергенлер. Баьтирлер арамыздан кетедилер, кетсе де олар халкынынъ юрегинде, эсинде, тарихте дайым да яшаяклар, – деди оьз соьзинде Мухтар Мусаев.
Мухаммад Атангулов сыйлы Кураннынъ аятларын окып, Кудай йигитлеримизди амансакласын деп тилек тиледи. Ол сыйлы Ораза айында гуманитарлык юк йиберилуьвининъ маьнеси эм савабы айлак та артатаганын айтты. Согыс спецоперация озып турган ерге гуманитарлык югин элтемеге сыйлы эм яваплы борыш мектебтинъ ОБЗР сабагынынъ окытувшысы Эрманбет Исрапил увылы Ораковка тапшырылды, ол неше кере де йигитлеримизге юк элтеген. Бу йолай оны ман бирге коьликти айдап, Запорожье областине карап Альберт Хасанбиевич Нурлыбаев кеткен.
Газель коьлигиннен оьзге, бизим йигитлерге азыкларга толган экинши коьлик те йол алды. ДНР-га карап кеткен экинши коьликти Эльмира Лыкова айдады, онынъ касында Кадрия атындагы мектебининъ окытувшысы, СВО катнасувшысынынъ хатыны Вера Бальтовна Абдулсаметова кетти.
Айтып озайык, гуманитарлык юклер тийисли ерлерге еткерилген эм оларды элтеп кеткенлердинъ аьр бириси аман-эсен Ногай районга кайткан.
Нурият Кожаева.
Суьвретте: балалар посылкаларды ерлестирген мезгил.