Йыл сайын язлык таркавлары алдында Ногай районынынъ орталыгындагы балалар китапханасында «Балалар китабининъ юмалыгы» сыхырлы байрамга
айланып озгарылады. Янъыларда да Юмалыктынъ ашылувы ман байланыста «Халклар китаплер мен досласадылар» деген шакырув астында, Россия Халклар Бирлик йылына багысланып, кызыклы шара оьтти. Шарады балалар китапхана заведующийи Зарема Джумалиева ашты. Сонъ китапхана куллыкшысы Фаризат Эспергенова китапхана конакларын балалар китабининъ юмалыгынынъ ашылувына багысланган байрамынынъ тарихи мен
таныстырды.
Бу куьнги шара Россия Халклар Бирлик йылына багысланувы ман байланыста, методист Медина Шамбилова окувшылар ман бирге элимиздинъ коьпмиллетли маданияты бойынша «элгезерлик» этти. Олар ойынга уьйкен кызыксынув ман коьштилер. Ойын барысында балалар Уллы Элимиздинъ туьрли халкларынынъ аьдетлери, маданияты ман таныстылар.
Шара бойынша окувшылар З.Булгаровадынъ «Янбикеш» пьесасы бойынша салынган «От этюда до спектакля» деген мектеб театрынынъ катнасувшыларынынъ постановкасын карадылар.
Окувшылар М. Мавлимбердиева «Россия балалары», Р.Курманбаева «Биз уьйкен элде яшаймыз», С.Бариева «Россия бир уьйкен аьел эсабында», Э.Шураева
«Эвенкия», Ч.Доржиев «Карелия акында», Л.Аубекерова «Дагестан», З.Бегендиков «Бизде орыс болмаганлар коьп» деген ятлавларды яттан окыдылар. А.Шамова «Авылыма», Р.Колебаева «Казаклар» деген йырларын йырлап, йыйылганларды сукландырдылар. К.Куруптурсунов кобызда ярасыклы ойнады. Баьрисин де коьнъил коьтерилис бийледи.
Сонъында балалар Юмалыктынъ ашылувына деп аьзирленген китап выставкасы ман таныстылар. Мунда Россия элимиз акында китаплер эм Россия хакларынынъ эртегилери коьрсетилген эди. Байрам катнасувшылары савкатлар алып, уьйлерине йогары коьнъилде, кайттылар.
Нурият Кожаева.