Россия Президенти Владимир Путин Дагестанда куьшли ямгырлардан сонъ туьзилген авыр аьлининъ сырагыларын тайдырув бойынша специальлик оькимет комиссиясын туьзуьв тапшырмасын берди. Оны Россия МЧС етекшиси Александр Куренков басшылар.
Онынъ сырасына федеральлик власть органлар ваькиллери, регион етекшиси, солай ок СКФО-да РФ Президентининъ толы ыхтыярлы орынбасарларынынъ бириси кирер.
«Сенемен: ювык арада туьзилеек комиссия – буьгуьн оькимет тийисли документти шыгарар, регион алдында турган борышларды толтыра эм аьдемлерге коьмек эте берип, пайдалы эм заманында ок куллык этер. Эм мага болаяткан баьри зат акында куьнде де билдирип турынъыз деп тилек саламан», – деди патшалыгымыздынъ етекшиси.
Ол регионда келтирилген зыян оьлшемин токтастырув бойынша ис куьплер туьзуьвге эс каратпага керегин белгиледи.
– Олар – кыйынлыкларга туьсип, зыян коьрген аьеллер мен соравларды туврадан-тувра шешпеге керек аьдемлер. Мен сизге аьр аьелге, аьр аян аьлге айырым эс каратпага тилеймен. Анълайман, эм солай да болады ондай аьллерде коьбисинше: бир зат сонъына дейим кепленмеген, баскасы – дурыс
кепленмеген. Эм, оьзек те, ондай соравларды парахатлык пан, закон талаплавлардан шыга берип, шешпеге керек. Ама бас орында – аьдемлерге тез ок ярдам
этуьв деген бир борыш турмага керек, – деди Россия Президенти.
Владимир Путиннинъ тапшырмасына явапка Дагестанда авыр ава шартлары ман туьзилген аьл сырагыларын тайдырув бойынша Оькимет комиссиясы туьзилди. РФ премьер-министри Михаил Мишустин сондай комиссияды туьзуьв акында распоряжениеге кол басты.
Путиннинъ тапшырмасы ман келисте, оны Россия МЧС министри Александр Куренков басшылады. Бу янъы структурасын туьзуьв – республикамыз еринде куьшли ямгырлардан сонъ туьзилген аьл сырагыларын тайдырувда маьнели абыт. Ол, МЧС, Савлык саклав министерствосы эм баска тийисли ведомстволар киргистилип, федеральлик эм региональлик власть органлар аьрекетин онълайды. Онынъ исининъ пайдалыгы бу баьри катнасувшылар ара ийги туьзилген аьллесуьв юритуьв, толтырылмага керек борышларды уьлестируьв эм тез ок аьлде карарларды кабыл этип алув ман байланыслы.