Аьр бир аьдем сайлаган кесписи бойынша уста специалист болмага тийисли, ис борышларын яваплы толтыратаган инсан етекшилеви яктан сый да казанады. Сондай аьрекетши болады «село Терекли-Мектеб» СП МО-сында хозяйстволык эсап юритуьв эм уйгынлав бойынша специалист Тойдык Зиявдин кызы Байгишиева. Онынъ ис сулыбы бай, биринши караска – сусы сувык, ама аьр кайсы соравга да тувра эм анъламлы явап берип болатаган кыскаяклы.

Аьдемнинъ турган турысы, соьйлеген соьзи коьп зат акында айтады. Тойдыкка бир каравынъ ман анълайсынъ онынъ аьрекети бойынша яваплылыгын: ис орынында баьри затлары да ерли-еринде, авылдынъ аьр бир орамы, сонда яшаган аьдемлери, кимди излесе де, бир такыйка кетпей, олар акында билдируьвлерди табады…
Сол сахый касиетин «село Терекли-Мектеб» СП МО аькимбасы Марат Избулла увылы Кулунчаков та белгиледи.
Тойдык Зиявдин кызы Ростов каласындагы Халк хозяйство институтынынъ экономикалык факультетин окып битирген. Оннан сонъ ис аьрекетин туьрли йылларда туьрли ерлерде бардырган. Аьли болса, Терекли-Мектеб авыл администрациясында ис сулыбы бай, терен билимли куллыкшы болып саналады. Оьзин де тек ийги яктан коьрсетип, яс специалистлерге ийги коьрим де болады.
Тезден ерли самоуправление куьни белгиленеди. Соны ман байланыслы болып, ийги куллыкшыды эм онынъ ис коллективин байрам ман кутлап, тек уьстинликлерди йорайман.
Г.Курганова.
Суьвретте: Т.Байгишиева.