Янъыларда Ногай районынынъ администрациясында муниципалитет аькимбасы Джамалутдин Эсиргепов согыс спецоперация катнасувшысы Иса Нурманбетов пан йолыгысты.
Айтып озайык, Ногай районынынъ Нариман авыл яшавшысы Иса Нурманбетов Россия Федерациясынынъ Савытлы куьшлер сырасында контракт бойынша кызмет этеди.
Иса Ногай районы бойынша Россия МВД кинологлар службасынынъ тамада инспекторы Тимур Бекманбет увылынынъ эм Ногай район бойынша КЦСОН куллыкшысы Эльнара Васильевнадынъ аьелинде тувып оьскен. Аьскерши А.Асанов атындагы Нариман авыл орта мектебин тамамлап, 2021-нши йылда эр борышын толтырмага йолланган. Службады тамамлаган сонъ, ол элимиздинъ бас каласы Москвада куллык эткен. Янъыларда Иса Нурманбетов кесек болжал тыншаювга уьйине келди.
Джамалутдин Эсиргепов пан согыс спецоперация катнасувшысы Россия Федерациясынынъ Савытлы куьшлери сырасында кызмет этуьв соравлары бойынша йылы аьлде кенъестилер. Ногай районынынъ аькимбасы сондай ашык хабарласувга дайым аьзир. Кенъестинъ барысында туьрли соравлар каралдылар, солардынъ ишинде аьскершиге ер участогы берилуьв бойынша соравы да айырым орынды алды.
Аьскерши мен ер участогы шыгарылувы акында берилген аьризединъ копиясы, СВО катнасувшыларынынъ орамындагы ерге тийисли документлерин туьзетуьв ниет пен, Терекли-Мектеб авыл администрация аькимбасы Марат Кулунчаковка йиберилди.
Белгилеп озайык, район аькимбасы уьшин согыс спецоперация катнасувшылары эм олардынъ аьеллерининъ маьселелерин шешуьв дайым бас орында турады.
Суьвретте: йолыгыстынъ барув мезгили.